Almaty jáne Aqtóbe oblystarynda fermerlik dalalyq mektepter ashylady
ASTANA. KAZINFORM — Bastamanyń maqsaty — fermerlerdi agroormanmelıoratsııanyń zamanaýı ádisterine oqytý arqyly jerdi turaqty paıdalaný men jaıylymdyq alqaptardy qalpyna keltirýdi ilgeriletý, dep habarlaıdy AShM baspasóz qyzmeti.
GCP/KAZ/005/GFF jobasy — «Qazaqstanda klımattyq turaqtylyqty qamtamasyz etý jáne jaıylymdardy qalpyna keltirý úshin agroormanmelıoratsııa» sheńberinde Almaty jáne Aqtóbe oblystarynda fermerlik dalalyq mektepter qurylady.
Jobany BUU-nyń Azyq-túlik jáne aýyl sharýashylyǵy uıymynyń qoldaýymen «Qazaqstannyń ekologııalyq uıymdary qaýymdastyǵy» zańdy tulǵalar birlestigi júzege asyryp jatyr.
Almatyda Qazaq mal sharýashylyǵy jáne mal azyǵy óndirisi ǵylymı-zertteý ınstıtýtynyń bazasynda kóshpeli jaıylym mektebin ashý josparlanyp otyr.
24–25 maýsym kúnderi Aqtóbe oblysynyń Áıteke bı aýdanynda jaıylymdardy baǵalaý jáne praktıkalyq jattyǵýlardy qamtıtyn oqytý semınarlary men dalalyq sabaqtar ótedi. Shara sońynda qatysýshylarǵa sertıfıkattar tabystalady.
Joba Qazaqstannyń klımattyń ózgerý saldaryna, sonyń ishinde jaıylymdardyń tozýy men aýyl sharýashylyǵy ónimdiliginiń tómendeýine beıimdelýine yqpal etýge baǵyttalǵan.
— Fermerlik dalalyq mektepter aýyl sharýashylyǵy óndirýshilerine jer resýrstaryn turaqty basqarý ádisterin meńgerýge, topyraq qunarlylyǵyn qalpyna keltirýge jáne mal sharýashylyǵynyń tıimdiligin arttyrýǵa múmkindik beredi. Sonymen qatar atalmysh mektepter Qazaqstan agrosektorynda ǵylym men praktıkany ushtastyratyn jańa tıimdi alańǵa aınalyp, ornyqty aýyl sharýashylyǵynyń tabysty úlgilerin eldiń basqa óńirlerinde keńinen taratýǵa arnalǵan perspektıvaly qural bolmaq, — delingen habarlamada.
Buǵan deıin organıkalyq eginshilikke jaramdy jerlerdiń tsıfrlyq kartacy jasalatyny aıtyldy.