Almaty jańbyrly maýsymǵa daıyn ba: bıyl qalada sý basý qaýpi bar 129 ýchaske anyqtaldy
ALMATY. KAZINFORM – Almatyda kúzgi jaýyn-shashyn kezinde kóshelerdi sý basý, aryqtardyń sý ótkizý qabiletine qatysty máseleler kóteriledi. Kazinform tilshisi aldaǵy aptada Almatyda jańbyr jaýatynyn eskerip, Almatynyń kúzgi jaýyn-shashynǵa daıyndyǵyn zerdelep kórdi.
Qazgıdromet málimetinshe, Almatyda 21-25 qazan aralyǵynda jańbyr jaýady. Jańbyrly maýsymdaǵy qalanyń jaıy kópti alańdatady.
Áleýmettik jelide Almatyda 5 qazanda bolǵan qatty jańbyrdan keıingi megapolıstiń ártúrli bóliginde sý jınalǵanyn kórsetetin beınejazbalar tarady.
Almaty turǵyny Taraz kóshesindegi jaǵdaıdy kórsetip, kúz bastalǵan saıyn osyndaı kóriniske tap bolatynyn jazǵan.
- Almaty qalasy, Taraz kóshesi. Kúz bastalsa, osy. Osy máseleni qashan sheshedi ekenbiz?, – deıdi ol.
Taǵy bir vıdeoda Altyn orda bazarynyń mańy kórsetilgen. Kóshe sýǵa tolyp qalǵanyn kórýge bolady.
Sonymen qatar jańadan jóndelgen aryqtardyń jaǵdaıyna qatysty da syn aıtyldy. Qala turǵyndarynyń biri jańbyr jaýmaı turyp, jaı sý jiberilgen kezde-aq aryq sý ótkize almaı jatqanyn aıtty.
Turǵyndardyń pikirinshe, másele tek kóshelerde sýdyń jınalýymen shektelmeıdi. Taǵy bir almatylyq jańbyrdan keıin qala kóshelerindegi taqtaıtastardyń taıǵaq bolatynyn aıtyp, olardyń qanshalyqty qolaıly ekenin synǵa aldy.
Kazinform tilshisi almatylyqtardyń shaǵymynan soń, qala ákimdiginen qandaı shara jasalǵanyn surap saýal joldady.
Ákimdik qandaı sharalar qabyldady?
Almaty ákimdiginiń málimetinshe, 2026 jyly qala aýmaǵynda sý basý qaýpi bar 129 problemalyq ýchaske anyqtaldy. Qazir onyń 114-de jóndeý tolyq aıaqtalǵan, taǵy 7 ýchaskede jumystar jalǵasyp jatqan kórinedi. Qalǵan 8 ýchaskede jóndeý júrgizý josparlanǵan.
- Qala aýmaǵynda jaýyn-shashynnan keıin sý basýdyń aldyn alý maqsatynda aryq jelilerin tazalaý jáne olardyń sý ótkizý qabiletin qamtamasyz etý jumystary turaqty túrde júrgiziledi. Jaýyn-shashyn kezinde jedel áreket etý úshin qala boıynsha 250-den astam arnaıy tehnıka, 50 motopompa, 18 assenızatorlyq mashına jáne 70 brıgada kezekshilik etedi. Sonymen qatar Almaty qalasy Tótenshe jaǵdaılar departamentiniń tarapynan 53 arnaıy tehnıka men 250 adam kezekshilik atqarady, - dep málimdedi Almaty ákimdigi.
Málimdeýinshe, 2026–2027 jyldardaǵy kúzgi-qysqy kezeńge daıyndyq aıasynda aryq ótkelderin tazalaý, aryq júıelerindegi qoqystardy shyǵarý jáne olardyń sý ótkizý qabiletin qamtamasyz etý jumystary júrgizilip jatyr.
Almatydaǵy aryq jelileriniń jalpy uzyndyǵy – 1 101 shaqyrym.
- Jańadan salynatyn nemese jóndeletin aryq jelileriniń tehnıkalyq jaı-kúıi aldyn ala zerdelenip, anyqtalǵan máselelerge sáıkes tıisti jumystar josparlanady. Jıi kezdesetin máselelerdiń biri- aryq ótkelderiniń sý ótkizý qabiletiniń jetkiliksizdigi. Mundaı jaǵdaılarda ýchaskeniń erekshelikteri eskerilip, qajet bolǵan jaǵdaıda aryq ótkelderiniń ótkizý múmkindigin arttyrýǵa baǵyttalǵan jóndeý júrgiziledi, - delingen ákimdik habarlamasynda.
Eske salsaq, Almaty kóshelerindegi SkyTrain qorshaýlaryna turǵyndar nazar aýdaryp, jańa kólik joly salynýyna qyzyǵýshylyq tanytqan edi.
