Almaty vagon paıdalaný deposynyń dırektory qamaýǵa alyndy
ALMATY. KAZINFORM — «Qazaqstan temir joly» ulttyq kompanııasy Almaty vagon paıdalaný deposynyń dırektoryna qatysty júrgizilip jatqan sotqa deıingi tergeý jóninde túsinik berdi.
Kompanııanyń habarlaýynsha, kásiporyn basshysy 2026 jylǵy 9 sáýirde qylmystyq is aıasynda ustalǵan. Tergeý onyń 2024–2025 jyldardaǵy qyzmet kezeńin qamtyp otyr.
Sot kúdiktige qatysty qamaýda ustaý túrindegi bultartpaý sharasyn sanktsııalaǵan.
«Qazaqstan temir joly» UK» AQ sybaılas jemqorlyqqa múldem tózbeýshilik qaǵıdatyn ustanatynyn atap ótti. Kompanııa qoldanystaǵy zańnama aıasynda qajetti aqparat pen materıaldardy usynyp, tergeý organdaryna jan-jaqty qoldaý kórsetip jatqanyn málimdedi.
— Sonymen qatar quqyq buzýshylyqtyń jasalýyna yqpal etken sebepter men jaǵdaılardy anyqtaý maqsatynda Almaty vagon paıdalaný deposynda ishki tekserý bastaldy. Tekserýdi kompanııanyń komplaens-qyzmeti jetekshilik etetin komıssııa júrgizip jatyr, — delingen habarlamada.
QTJ tergeý aıaqtalyp, quzyretti organdar protsessýaldyq sheshim qabyldaǵanǵa deıin qosymsha túsinikteme bermeıtinin habarlady.
Eske salaıyq, buǵan deıin «Qaztemirtrans» Almaty fılıaly dırektory Aqylbek Bazenovtiń ustalýyna qatysty túsinik bergen edi.
