Almaty TJD turǵyndarǵa aýa raıynyń kúrt nasharlaýyna baılanysty eskertý jasady

ALMATY. KAZINFORM – Almatynyń tótenshe jaǵdaılar departamenti «Qazgıdromettiń» 8 jeltoqsanǵa jarııalaǵan aýa raıyna baılanysty eskertýine oraı turǵyndar men qala qonaqtaryna qaýipsizdik sharalaryn saqtaýdy eskertti.

Sınoptıkterdiń málimetinshe, erteń taýly aımaqtarda qalyń qar jaýyp, kóktaıǵaq bolady. Al qala ishinde tuman kúsheıip, aýa temperatýrasy birtindep tómendeıdi.

Tótenshe jaǵdaılar departamenti turǵyndarǵa jolǵa shyǵarda baǵyt pen ýaqytty aýa raıyna qaraı josparlaýdy eskertti.

Qaýipsizdik boıynsha usynystar:

• Qala qonaqtary men týrısterge taýǵa shyǵýdy keıinge qaldyrý usynylady.

• Taýly aımaqtarda júrgen azamattarǵa qarańǵy túsip ketpeı úıge oralý qajet. Óıtkeni aýa raıy nasharlasa, keri qaıtar joldy tabý qıyndaýy múmkin.

• Kólikterdi aǵashtardyń túbine qoımaý kerek, ekpini kúshti jel kezinde olar qulap túsip, zaqym keltirýi yqtımal.

• Áli tolyq bitpegen nemese álsiz bekitilgen qurylys mańynda júrmeý qajet, qulaý qaýpi bar.

• Peshpen jylytatyn úılerde tútin murjasynyń durys jabylǵanyn jáne aqaýy joq ekenin tekserý kerek. Bul ýly gazdyń úıge taralýynan qorǵaıdy.

• Elektr qurylǵylaryn shamadan tys qospańyz.

Eske salaıyq, buǵan deıin 7 jeltoqsanda respýblıkadaǵy qaı joldarda shekteý bar ekenin habarlaǵanbyz.