Almaty Túrki áleminiń jastar astanasy mártebesin Hıýaǵa tapsyrdy
ASTANA. KAZINFORM — Almaty qalasynda «Almaty — Túrki áleminiń 2025 jylǵy jastar astanasy» jylynyń resmı jabylý rásimi ótti. Bul týraly mádenıet jáne aqparat mınıstrligi málim etti.
Saltanatty jıynǵa Qazaqstan, Ázerbaıjan, Qyrǵyzstan, Túrkııa jáne Ózbekstan elderiniń ókilderi, Túrki memleketteri uıymynyń Bas hatshysy Kýbanychbek Ómirálıev, sondaı-aq uıymdaǵy baqylaýshy el sanalatyn Túrikmenstannyń delegatsııasy qatysty.
Eske salsaq, 2025 jylǵy 21 mamyrda Vengrııanyń Býdapesht qalasynda ótken Túrki memleketteri uıymynyń beıresmı sammıtinde Memleket basshysy Qasym-Jomart Toqaev Almatyǵa Túrki áleminiń jastar astanasy mártebesi beriletinin málimdegen edi. Osylaısha qala bul estafetany Ázerbaıjannyń Lenkoran qalasynan qabyldap aldy.
Bul mártebeniń berilýi Almatynyń túrki álemi jastarynyń basyn qosyp, jańa bastamalar men ortaq jobalarǵa jol ashatyn bedeldi jastar ortalyǵy retindegi ornyn taǵy bir márte aıqyndaı tústi.
Atalmysh mártebe qalaǵa 2025 jylǵy 18 tamyzda Túrki memleketteri uıymynyń IV halyqaralyq jastar festıvaliniń ashylýynda berildi.
— Jyl boıy «Túrki áleminiń jastar astanasy — 2025» jobasy sheńberinde túrli formattaǵy 50-den astam is-shara uıymdastyrylyp, oǵan Túrki memleketteri uıymyna múshe elderden 40 myńnan astam jas qatysty. Atap aıtqanda, 3-shi jastar almasý baǵdarlamasy, Jas kóshbasshylar men kásipkerler forýmy, Turki Fest Almaty — 2025 mádenı festıvali, TURKICUP — 2025 halyqaralyq «Jaıdarman» oıyny, Túrki memleketteri uıymy Jastar platformasynyń ІІІ Bas Assambleıasy jáne Halyqaralyq ekologııalyq hab sekildi aýqymdy jobalar júzege asyryldy, — delingen habarlamada.
Joba aıasynda jastardyń bastamalaryn qoldaý, volonterlik qozǵalysty damytý jáne azamattardyń qoǵamdyq ómirge belsendi aralasýyna aıryqsha mán berildi.
Saltanatty rásim barysynda Túrki áleminiń jastar astanasy mártebesi Almatydan Ózbekstannyń Hıýa qalasyna resmı túrde tabystaldy. Arnaıy kiltti tapsyrý rásimi túrki elderi arasyndaǵy dostyq baılanystardyń sabaqtastyǵyn, jastar bastamalarynyń jalǵasýyn jáne yntymaqtastyqtyń nyǵaıa túskenin aıshyqtady.
Aıta keteıik, jaqynda Ystanbulda Birinshi Túrkologııa quryltaıynyń 100 jyldyǵy atalyp ótti.
