«Almaty týrızmine salynǵan 1 teńge 34 teńge bolyp qaıtady» — maman

ALMATY. KAZINFORM — Megapolıste Almaty Tourism Bureau uıymdastyrýymen qalalyq týrızmdi damytý jáne bıýro josparymen tanystyrý maqsatynda baspasóz jıyny ótti.

Jıyn barysynda Almaty týrızm bıýrosynyń marketıng jáne taldaý bóliminiń basshysy Rýslan Janabaev mekemeniń maqsaty men mindetin aıtty.

— Biz 2012 jyly qarapaıym aqparattandyrý ortalyǵy retinde ashyldyq, bul — álemdik tájirıbe. Dúnıejúziniń barlyq týrıstik qalalarynda týrısterge resmı gıd bolyp, qajetti aqparatty bere alatyn ortalyqtar bar. Biraq bıyl biz qaıta quryldyq, endi Almatyny shetelde nasıhattaý jumysymen tolyqqandy aınalysamyz. 2024 jyldyń jańa trendi — týrıster úshin jańa baǵyttar, ıaǵnı adamdar tarıhı ǵımarattardy, kópqabatty úılerdi kórip boldy. Endi olar buryn bilmegen jańa álemdi kórgisi keledi, sol jerdiń tynys-tirshiligi, salt-dástúri qyzyqtyrady. Sondyqtan qalamyzdyń týrıstik áleýeti óte úlken. Qazirdiń ózinde qalada sheteldik týrısterdiń óte kóp ekenin baıqaýǵa bolady, - dedi ol.

Rýslan Janabaev 2023 jyly týrızm sektory Almaty qalasynyń bıýdjetine 71,7 mlrd. teńgeden astam salyq túsimderin ákelgenin atap ótti. Onyń aıtýynsha, qala bıýdjetine túsetin barlyq salyq kiristeriniń shamamen 5%-y osy týrızm sektorynan keledi.

— Ótken jyly Almatyǵa 2 mıllıon týrıst keldi, bul — rekord. Statıstıka júrgizile bastaǵan ýaqyttan beri mundaı kórsetkish bolmaǵan. Qala bıýdjetine qonaq úı syndy jatyn oryndary 74 mlrd teńge, al týrıstik operatorlar 8,7 mlrd teńge paıda ákeldi. Megapolıstiń 80 myń turǵyny týrıstik salaǵa qatysy bar nemese tikeleı osy sektorda jumys isteıdi. Bul qalanyń halqynyń — 7,7 paıyzy. Biz pandemııadan keıingi qıyn kezeńdi tolyq ótkerdik deı alamyz. Álemdik uıymdar kovıdke deıingi kórsetkishterge áli jetpedik dese, Almaty bul kórsetkishterden qazir asyp ketti, - dedi bıýronyń bólim basshysy.

Sondaı-aq ol týrızmdi damytýǵa jáne nasıhattaýǵa baǵyttalǵan 1 teńge qalaǵa salyq retinde 34 teńge bolyp qaıtatynyn aıtty. Almaty týrızm bıýrosynyń málimetine sáıkes, sońǵy 5 jyl ishinde týrıstik salanyń qalaǵa ákeletin tabysy 3 ese ósken.

Eske sala keteıik, buǵan deıin Almatyǵa aspan asty elinen kelgen týrısterdiń sany 2 ese óskenin jazǵan bolatynbyz.