Almaty týrıstik áleýetin Azııa elderinde jarnamalap jatyr
ASTANA. KAZINFORM — Sıngapýr men Kýala-Lýmpýr qalalarynda Almatynyń týrıstik áleýetin tanytatyn syrtqy jarnama ornalastyryldy, dep habarlaıdy Almaty ákimdiginiń baspasóz qyzmeti.
Joba Almaty qalasy Týrızm basqarmasy men AirAsia áýe kompanııasy arasyndaǵy yntymaqtastyq aıasynda júzege asyp, qalany halyqaralyq týrıster úshin qyzyqty saıahat núktesi retinde nasıhattaýǵa baǵyttalǵan.
— Jarnamalyq konstrýktsııalar adamdar men kólik kóp júretin oryndarǵa ornalastyryldy. Kórneki materıaldarda asqaq taýlardyń kórkem kórinisi, tabıǵı kórikti jerler men Almatynyń aıshyqty beınesi beınelengen. Sondaı-aq, «Almaty» jazýymen birge qalaǵa sapar shegýge, onyń biregeı rýhy men erekshe atmosferasyn sezinýge shaqyratyn úndeý berilgen, — delingen habarlamada.
Bul jarnamalyq naýqan Almatyny halyqaralyq naryqta tanytý jolyndaǵy júıeli jumystardyń jalǵasy boldy. AirAsia X enshiles kompanııasy Almaty men Kýala-Lýmpýr arasynda tikeleı áýe reısterin júzege asyryp, Ońtústik-Shyǵys Azııa elderinen keletin týrıster úshin qalanyń qoljetimdiligin arttyryp otyr.
Naýqan aımaqtan keletin týrıster sanyn arttyryp, Almatynyń zamanaýı ári qoljetimdi týrıstik baǵyt retindegi oń ımıdjin nyǵaıtpaq.
Budan buryn Almatyda Kólik ǵylymdary men tehnologııalary ınstıtýty qurylatynyn jazǵan bolatynbyz.