Almaty turǵyny vokzalda bomba týraly jalǵan habar bergeni úshin 4 jyl arqalady

ASTANA. KAZINFORM — Almaty qalasynyń 44 jastaǵy turǵyny temirjol vokzaldarynda jarylǵysh zat qoıylǵany týraly birneshe jalǵan habar bergeni úshin 4 jylǵa bas bostandyǵynan aıyryldy. Bas kólik prokýratýrasy málim etti. 

Ol jazasyn óteý barysynda tórt ret taksofon arqyly qońyraý shalyp, jarylǵysh zat qoıylǵany jaıly habarlaǵan.

— Onyń áreketteri evakýatsııa men tótenshe qyzmetterdiń jumyldyrylýyna sebep boldy. Jalǵan dabyldyń saldarynan memlekettik organdarǵa keltirilgen shyǵyn 3,3 mln teńgeden asty. Júrgizilgen saraptamalar qońyraý shalǵan adamnyń jeke basyn jáne onyń sózderinde tikeleı qaýiptiń bolǵanyn rastady, — delingen habarlamada.

Sot er adamdy Qazaqstan Respýblıkasy Qylmystyq kodeksiniń 273-baby boıynsha kináli dep tanydy.

Sottalýshy memleketke keltirilgen shyǵyndy óteýge jáne ótemaqy tóleýge mindetti.

Kólik prokýratýrasy mundaı qylmystar qoǵamdyq qaýipsizdikke qaýip tóndirip, aýyr saldarǵa ákeletinin eskertedi.

Eske sala keteıik, buǵan deıin Óskemende «polıtsııa bólimshesine bomba qoıdym» dep ázildegen áıel ustalǵan bolatyn.