Almaty turǵyny úshinshi qabatta ornalasqan páterine zańsyz qosalqy qurylys salǵan
ALMATY. KAZINFORM — Almatyda «Han Táńiri» turǵyn úı keshenindegi qosalqy qurylys sot sheshimimen buzylyp jatyr.
Qala qurylysyn baqylaý basqarmasy málim etkendeı, Kenesary han kóshesi, 54/33 úı mekenjaıyndaǵy turǵyn úı kesheniniń úshinshi qabatyndaǵy terrasada zańsyz salynǵan qurylys anyqtaldy.
— Almaty turǵyny eshqandaı ruqsat qujattarsyz óz páterine bir qabatty qosymsha qurylys salyp, turǵyn úı aýmaǵyn aıtarlyqtaı ulǵaıtqan. Páter ıesi ákimshilik jaýapkershilikke tartylyp, buzýshylyqtardy joıý týraly nusqama aldy, — dep atap ótti basqarmadan.
Alaıda, nusqama talaptary oryndalǵan joq. Sol sebepti sot sheshimimen buzylyp jatyr.
Nysandy bólshekteý jumystary Ádilet departamenti sot oryndaýshylarynyń qatysýymen júrgizilip jatyr.
Osyǵan deıin «Terekti» shaǵyn aýdanyndaǵy Aınalma kóshesi, 183 ýchaskesinde zańsyz salynǵan turǵyn úı kesheniniń buzylyp jatqany týraly jazǵanbyz.