Almaty turǵyny kóliginiń nómirin arnaıy qurylǵymen jasyrǵan

ALMATY. KAZINFORM — Almatyda beınebaqylaý kameralarynan aılasyn asyrmaq bolǵan 27 jastaǵy júrgizýshi qamaýǵa alyndy.

Almaty qalalyq PD jergilikti polıtsııa qyzmeti basqarmasy basshysynyń orynbasary Tımýr Noǵaıbaevtyń aıtýynsha, Súıinbaı dańǵylynda patrýldik polıtsııa qyzmetkerleri kúdik týdyrǵan kólikti toqtatyp, tekserý barysynda onyń aldyńǵy nómirin jasyryn mehanıkalyq qurylǵy arqyly aýdaryp otyratynyn anyqtady.

— Qalanyń beınebaqylaý júıesi arqyly bul kólikke nazar aýdardyq. Júrgizýshi arnaıy pýlttiń kómegimen memlekettik nómirdi aýdaryp, jol qozǵalysy erejelerin óreskel buzǵan. Bul áreket ózge jol qozǵalysyna qatysýshylar úshin qaýip tóndirdi. Zańsyzdyqty anyqtaǵan tártip saqshylary kólik ıesin ustady, — dedi Tımýr Noǵaıbaev.

Aıtýynsha, sot sheshimimen quqyqbuzýshy ákimshilik jaýapqa tartyldy.

— 27 jastaǵy júrgizýshi 3 táýlikke qamaýǵa alynyp, 1 jylǵa kólik júrgizý quqyǵynan aıyryldy, — dep atap ótti polıtsııa ókili.

Eske salsaq, buǵan deıin Almatyda pılottyq rejımde «Sergek» beınebaqylaý kameralarynyń jańa fýnktsııasynyń iske qosylǵany týraly jazǵan edik.