Almaty turǵyny 3 jyl buryn satqan kóligin urlap ketken

ALMATY. KAZINFORM —  Almatyda er adam osydan úsh jyl buryn satqan Lexus kóligin ózi urlap, qylmysyn jasyrý úshin biraz aılaǵa barǵan. Bul týraly Polisia.kz jazdy.

Almaty qalasynyń krımınaldyq polıtsııa qyzmetkerleri jol talǵamaıtyn avtokóliktiń urlaný deregin ashty. Qylmys muqııat josparlanǵanymen, polıtseılerdiń jedel ári úılesimdi áreketteriniń arqasynda kúdikti anyqtalyp, qolǵa tústi. 

Belgili bolǵandaı, kóliktiń burynǵy ıesi, 1982 jyly týǵan azamat, úsh jyl buryn avtokóligin satqan, alaıda qosalqy kiltin ózinde alyp qalǵan. Keıin ol jeke paıdany kózdep, kóliktiń qazirgi turǵan ornyn anyqtap, qosalqy kilt arqyly urlyq jasaǵan. Qylmys izin jasyrý úshin kúdikti aldyn ala daıyndalǵan: betperde, aýystyratyn kıim satyp alyp, urlyqtan keıin syrt kelbetin ózgertip, beınebaqylaý kameralaryna túsip qalmaýǵa tyrysqan. Urlanǵan kólik qalanyń shetine jasyrylǵan, keıinnen ony polıtsııa qyzmetkerleri tapty. 

— Qylmys qanshalyqty muqııat josparlansa da, jaýapkershilikten qutylý múmkin emes. Zańdy buzǵan árbir adam onyń jazasyz qalmaıtynyn bilýi kerek. Kúdiktige qatysty sotqa deıingi tergeý júrgizilýde. Ol óz kinásin moıyndap, jaýap berip jatyr. Avtokólik tárkilendi, – dedi, Almaty qalalyq PD krımınaldyq polıtsııa basqarmasynyń bastyǵy Talant Isaev.

Buǵan deıin habarlanǵandaı, Taraz qalasynyń turǵyny jalǵan qujatpen memleketten zańsyz páter alǵan.