Almaty turǵyndarynyń jolǵa qatysty máselesi qalaı sheshilip jatyr
ALMATY. KAZINFORM – Almaty ákimdiginiń jol ınfraqurylymyna arnalǵan arnaıy Telegram-kanaly iske qosylǵannan beri kún saıyn 30-40 ótinish túsedi. Bul ótinishterdi mamandar men jumysshylar orta eseppen úsh jumys kúni ishinde qarastyrady.
Qalalyq ákimdik taratqan málimetke sáıkes, Telegram arnasyndaǵy jol ınfraqurylymyna arnalǵan @AlmatyJolybot chat-botyna 23 sáýirden bastap kún saıyn 30-40 ótinim tirkeledi. Barlyǵy 400-den astam ótinish kelip tústi, onyń 70%-dan astamyna tıisti jaýap berildi. Sondaı-aq ótinimder open-almaty.kz ınternet portaly men eOtinish servısi arqyly da qabyldanady.
«Ár aýdannyń merdigerlik uıymdary monıtorıng barysynda jáne qala turǵyndarynyń túrli arnalar arqyly kelip túsken ótinishi negizinde anyqtalǵan shuńqyrlardy jóndeıdi. Jalpy, jumys bastalǵaly 41 000 sharshy metr jol tósemi aǵymdaǵy jóndeýden ótti. Bul rette, jyl sońyna deıin 310 000 sharshy metr asfaltbeton jabyny bar joldardy jóndeý josparlanǵan», - dep atap ótti ákimdikten.
Taldaý kórsetkendeı, Almatyda shuńqyrlardy jóndeýdiń shamamen 90 paıyzy 5 jyldan astam ýaqyt ortasha jóndeý júrgizilmegen joldarǵa, sondaı-aq ınjenerlik jelilerdi salý jáne jóndeý júrgizilgen ýchaskelerge tıesili. Bıyl uzyndyǵy 250 km bolatyn 274 kóshede ortasha jóndeý jumystaryn júrgizý josparlanyp otyr.
Eske salaıyq, 2023 jyly Almatyda uzyndyǵy 200 km bolatyn 175 kóshede jol jabynyna ortasha jóndeý júrgizildi, ortasha jóndeýge kepildik merzimi 3 jyl, osy ýaqyt ishinde merdiger kez kelgen aqaýdy ózi túzetedi.
Bul rette, byltyr pılottyq rejımde qalanyń 15 magıstraldyq kóshesinde jóndeý kezinde jolǵa jáne jaryqqa tózimdilikti arttyrýǵa baǵyttalǵan polımerasfaltobeton paıdalanyldy.
Mundaı qospalar tozýǵa tózimdi, jumsartý temperatýrasy joǵary (65-70°C). Sondyqtan ystyqqa tótep bere alady, áldeqaıda uzaǵyraq – qazirgi 5 jyldyń ornyna 8-10 jylǵa deıin paıdalanýǵa bolady. Bıyl da bul tájirıbe jalǵasady.
Buǵan deıin Almatydaǵy joldardyń boıyndaǵy aqaýlardy Almaty_Joly Telegram-arnasynyń chat-botyna habarlaýǵa bolatyny týraly jazǵan edik.
