Almaty turǵyndarynyń úshten biri jastar — Arman Qyryqbaev
ALMATY. KAZINFORM – Almatyda Bostandyq aýdanynyń komıýnıtı ortalyǵynda Qazaqstannyń barlyq aımaqtarynan kelgen Jastar saıasaty basqarma basshylarynyń sleti ótti. Bul týraly shahar ákimdiginiń baspasóz qyzmeti málim etti.
Іs-sharaǵa Almaty qalasy ákiminiń orynbasary Arman Qyryqbaev, QR Mádenıet jáne aqparat mınıstrliginiń Jastar jáne otbasy isteri komıtetiniń tóraǵasy Qaırat Qambarov, Respýblıka boıynsha Jastar saıasaty basqarma basshylary, Jastar resýrstyq ortalyqtarynyń jetekshileri, qalamyzdyń belsendi jastary, úkimettik emes uıymdardyń tóraǵalary, Jastar keńesiniń músheleri qatysty.
Kezdesý barysynda Arman Orazbaıuly qala ákimdiginiń jastarǵa arnalǵan áleýmettik ınfraqurylym qurýdaǵy jumystary týraly toqtalyp, atap ótti.
— Almaty turǵyndarynyń shamamen úshten biri nemese 682 myńy 14 pen 35 jas aralyǵyndaǵy jastar. Bul óz kezeginde bizden jastardy qalamyzdyń damýy úshin atqarylyp jatqan jumystarǵa belsendi tartýdy, olardyń jaıly ómir súrýi, jumys isteýi, bos ýaqytyn tıimdi ótkizýi úshin qolaıly jaǵdaılar jasaýdy talap etedi. Osy oraıda biz qalamyzdyń barlyq aýdanynda NEET jastardy qoldaý úshin 8 komıýnıtı ortalyq ashtyq, — dedi qala ákiminiń orynbasary Arman Qyryqbaev.
Aımaqtardan kelgen qonaqtarǵa komıýnıtı ortalyqtardyń jumysymen Almaty qalasynyń Jastar saıasaty basqarmasynyń basshysy Qaıyrjan Mendiǵalıev tanystyrdy.
— Árbir komıýnıtı ortalyq kreatıvti qoǵamdyq keńistikti quraıdy. Munda jastardy qoldaý úshin qajettiniń bári bir jerde jınaqtalǵan: bul ártúrli memlekettik baǵdarlamalar boıynsha keńes berý, psıhologııalyq jáne zańgerlik kómek, NEET jastaryn qysqa merzimdi kýrstar arqyly ózekti mamandyqtarǵa oqytý jáne jumysqa ornalastyrý, — dep atap ótti Qaıyrjan Mendiǵalıev.
Aıta keteıik, Almaty qalasyn damytý baǵdarlamasy aıasynda 2025 jylǵa deıin ár aýdanda ekiden jalpy 16 jastar komıýnıtı ortalyǵyn iske qosý josparlanǵan, olardyń 8-i jumysyn bastady.
Іs-sharaǵa qatysqan qonaqtar barlyq aýdandardaǵy komıýnıtı ortalyqtarda bolyp, Almaty qalasynyń jastar saıasatanyń jumysyna joǵary baǵasyn berdi.
— Jastarǵa qoldaý kórsetetin, qajettiniń barlyǵy bir jerde jınaqtaǵan komıýnıtı ortalyqtardy kórip qýanyp otyrmyn. Munda jastardy qoldaý úshin barlyq jaǵdaı jasalyp, eń bastysy barlyq qyzmet túrin tegin alýǵa bolatyny, meni qýantty. Meniń oıymsha bundaı formattaǵy ortalyqtar tek Almatyda ǵana emes, elimizdiń barlyq qalalarynda bolý qajet, — dedi óz sózinde komıtet tóraǵasy Qaırat Qambarov.
Jastar saıasatynyń basty maqsaty — árbir jas almatylyqqa qoǵamda óz ornyn tabýǵa kómektesý. Al komıýnıtı ortalyqtar jastardy áleýmettendirýdiń mańyzdy quraly bolýǵa baǵyttalǵan.
