Almaty turǵyndarynyń 10%-ynda ǵana sırek kezdesetin qan toby bar
ALMATY. KAZINFORM — Almatyda kún saıyn 110-nan 120-ǵa deıin qan quıylady. Qalalyq qan ortalyǵy 28 aýrýhana, perzenthana jáne áskerı medıtsına mekemelerin qan komponentterimen qamtamasyz etedi.
Jyl saıyn shamamen 20 myń adam qan tapsyrady. Sonyń arqasynda naýqastarǵa 38 myńǵa jýyq doza qan komponentteri quıylady.
Almaty qan ortalyǵynyń donorlardy jasaqtaý bóliminiń meńgerýshisi Nurdáýlet Ábdiqadyrovtyń aıtýynsha, ortalyqqa barlyq qan tobynyń donorlary qajet. Almaty turǵyndarynyń shamamen 30%-y birinshi, ekinshi jáne úshinshi qan toptaryna jatsa, tórtinshi qan tobynyń úlesi — 10%.
— Jyl saıyn 19-20 myńǵa jýyq adam qan tapsyrady. Sonyń arqasynda naýqastarǵa 37-38 myń doza qan komponentteri quıylady. Qaýipsiz ári sapaly qan daıyndaý úshin Qan ortalyǵynda zamanaýı jabdyqtar qoldanylady. Qan komponentteri arnaıy tekserýden ótkizilip, leıkotsıtterden tazartylady jáne vırýstardan zalalsyzdandyrylady. Qan alý kezinde tek bir rettik medıtsınalyq quraldar paıdalanylady, sondyqtan donor úshin ınfektsııa juqtyrý qaýpi joq. Árbir tapsyrylǵan qan birneshe kezeńnen turatyn muqııat tekserýden ótedi, — dedi Nurdáýlet Ábdiqadyrov Almaty óńirlik kommýnıkatsııalar qyzmetinde ótken brıfıngte.
Donor bolý úshin adamnyń jasy 18-den asqan, boıy keminde 150 santımetr, salmaǵy 50 keliden joǵary bolýy jáne medıtsınalyq qarsy kórsetilimderi bolmaýy qajet.
Sozylmaly aýrýlardyń keıbir túrimen aýyratyndar, V jáne S vırýsty gepatıtterin, AITV-ınfektsııasyn, týberkýlezdi jáne ózge de birqatar aýrýdy ótkergen azamattar qan tapsyra almaıdy. Sonymen qatar operatsııadan, tis juldyrǵannan, tatýajdan, pırsıngten nemese vaktsına alǵannan keıin belgili bir merzimge donorlyqqa ýaqytsha shekteý qoıylady.
Qan tapsyrar aldynda árbir úmitker 30-dan astam suraqtan turatyn saýalnamany toltyrady. Keıin medıtsınalyq tekserýden jáne zerthanalyq zertteýden ótedi. Mamandar qan tobyn, rezýs-faktoryn anyqtap, jalpy qan taldaýyn júrgizedi, sondaı-aq AITV, V jáne S gepatıtteri men merezge tekseredi. Zertteý nátıjelerin kelesi kúni tirkeý bólimi arqyly nemese qan ortalyǵynyń saıtyndaǵy jeke kabınetten alýǵa bolady.
Qan ortalyǵy mamandary donorlar ózimen birge jeke basyn kýálandyratyn qujat alyp kelýge tıis ekenin eske saldy. Qazaqstan azamattary úshin bul — jeke kýálik, pasport nemese turý yqtııarhaty. Al shetel azamattary sheteldik pasport pen Qazaqstan Respýblıkasynyń JSN-i bolǵan jaǵdaıda donor bola alady.
Eske salaıyq, buǵan deıin Almatydaǵy donorlyq festıvalinde 36 lıtrden astam qan jınalǵanyn habarlaǵan edik.
