Almaty turǵyndaryna zat laqtyryp, qol kótergen sheteldik jasóspirimder elden shyǵarylady
ALMATY. KAZINFORM – Almatyda polıtsııa qyzmetkerleri qoǵamdyq oryndarda kámeletke tolmaǵandardyń quqyqqa qaıshy minez-qulyq kórsetý faktileriniń jolyn kesti.
Polıtsııanyń málimetinshe, tekserý júrgizýge áleýmettik jelilerde taraǵan vıdeolar sebep bolǵan. Onda bir top jasóspirimniń qala turǵyndaryna agressıvti ári ádepsiz áreket jasaǵan sáti túsip qalǵan.
Bul derekter boıynsha Medeý jáne Almaly aýdandarynyń polıtsııa basqarmalary tekserý is-sharalaryn júrgizdi. Polıtsııa qyzmetkerleri kámeletke tolmaǵandardyń kim ekenin anyqtap, aýmaqtyq polıtsııa bólimshelerine jetkizdi. Olar Tájikstan Respýblıkasynyń azamattary bolyp shyqty.
– Jasóspirimder Kámeletke tolmaǵandardy beıimdeý ortalyǵyna ornalastyrylyp, olarmen profılaktıkalyq jumystar júrgizilip jatyr. Tekserý qorytyndysy boıynsha olardyń zańdy ókilderi balalardy tárbıeleý jónindegi mindetterin tıisinshe oryndamaǵany úshin ákimshilik jaýapkershilikke tartyldy, - dep habarlady polıtsııa.
Sonymen qatar bul tulǵalarǵa qatysty Qazaqstan Respýblıkasynyń kóshi-qon zańnamasy sheńberinde el aýmaǵynan shyǵarý sharalary qabyldanady.
– Qazirgi ýaqytta árbir derek boıynsha tekserý jalǵasyp jatyr. Qorytyndysy boıynsha jasóspirimderdiń áreketterine quqyqtyq baǵa beriledi, - delingen habarlamada.
Eske salaıyq, buǵan deıin Almatyda jedel járdem qyzmetkerlerine qatysty agressııa kórsetý deregi boıynsha qylmystyq is tirkelgenin jazǵanbyz.
