Almaty turǵyndaryna kún raıyna baılanysty taýǵa barmaý kerektigi eskertildi
ALMATY. KAZINFORM - Almaty qalasynda búgin, 11 mamyr kúni jańbyr jaýyp, naızaǵaı oınaıdy dep boljanyp otyr.
Sınoptıkterdiń málimetinshe, túnde keı jerlerde nóser jańbyr jaýýy múmkin.
Sondaı-aq soltústik-batystan soǵatyn jeldiń ekpini sekýndyna 15–18 metrge deıin jetedi.
Qazgıdromet jarııalaǵan eskertýge súıengen qalalyq tótenshe jaǵdaılar departamenti Іle Alataýy aýmaǵynda kún raıy qolaısyz bolatynyn habarlady.
Atap aıtqanda, Aqsaı men Úlken Almaty ózenderi basseınderinde qatty jańbyr jaýyp, naızaǵaı oınap, burshaq bolýy yqtımal.
Taýly aımaqtarda jel ekpini sekýndyna 18–23 metrge deıin kúsheıýi múmkin.
Qutqarýshylar qala turǵyndary men qonaqtaryna saqtyq sharalaryn qatań saqtaýǵa keńes berdi.
Kún raıyna baılanysty eskertý kezinde taýǵa barýdan ýaqytsha bas tartý usynyldy.
Kúshti jel kezinde kólikterdi aǵashtardyń túbine qoıýǵa bolmaıdy.
Mamandar múmkindiginshe ǵımarattan shyqpaı, qaýipsiz jerde bolýǵa shaqyrdy.
Úıde bolǵan jaǵdaıda tereze men esikti myqtap jabý qajet.
Balkondar men aýlalardaǵy jel ushyryp áketýi múmkin zattardy jınap qoıý kerek.
Kóshede júrgen kezde jaqyn mańdaǵy ǵımaratqa nemese dúkenge kirip panalaǵan durys.
Aǵashtardyń, jarnama taqtalarynyń, qurylysy aıaqtalmaǵan nysandardyń janynda turý qaýipti.
Sondaı-aq elektr jelileri men úzilgen symdarǵa jaqyndaýǵa qatań tyıym salynady.
Osyǵan deıin 11 mamyrda elimizde 1–6 gradýsqa deıin úsik bolýy múmkin ekeni týraly jazdyq.
