Almaty turǵyndaryn qandaı quqyqtyq másele kóbirek alańdatady
ALMATY. KAZINFORM — «Zań men ádildik — eldiń irgetasy» jobasy qala turǵyndardyń quqyqtyq máselelerine taldaý jasady.
Almaty qoǵamdyq keńesiniń múshesi Nurǵalı Sahovtyń aıtýynsha, joba júzege asyrylǵan ýaqyt ishinde 400-den astam adam quqyqtyq qoldaý men keńes alǵan. Ótinishterdiń basym bóligi turǵyn úı-kommýnaldyq sharýashylyǵy, kópqabatty úılerdi basqarý, PIK pen MIB jumysy jáne kommýnaldyq qyzmetter máselelerine qatysty bolǵan. Mundaı suraqtar jalpy ótinishterdiń shamamen tórtten birine teń boldy, ıaǵnı 25%-ǵa jetti.
Taǵy 14%-y jyljymaıtyn múlik pen múliktik qatynastarǵa qatysty bolsa, 12%-dan astamy otbasylyq quqyq máselelerin qamtyǵan. Shamamen 11%-y qaryz óndirý, keltirilgen zalaldy óteý jáne sharttyq daýlarǵa baılanysty boldy. Al 7%-ǵa jýyǵy qujattardy rásimdeý men tirkeý máselelerin qozǵaǵan. Qalǵan ótinishter áleýmettik qoldaý, bilim berý, jer jáne eńbek daýlary, atqarýshylyq is júrgizý, kásipkerlik jáne nesıe mindettemelerine qatysty boldy.
— Bul kórsetkishter Qoǵamdyq keńes úshin mańyzdy. Óıtkeni árbir ótinish qala turǵyndarynyń kúndelikti kezdesetin máselelerin kórsetedi. Joba arqyly biz halyqty tolǵandyratyn ózekti problemalardy anyqtap, olardy sheshý boıynsha memlekettik organdar men qalalyq qyzmetterge naqty usynystar bere alamyz, — dedi Nurǵalı Sahov.
Onyń aıtýynsha, joba birden eki mańyzdy mindetti atqarady: azamattarǵa quqyqtyq kómek kórsetedi jáne qoǵamdyq monıtorıngtiń tıimdi quraly qyzmetin atqarady. Ótinishterdi taldaý júıeli máselelerdi anyqtaýǵa jáne sheshim qabyldaý kezinde halyqtyń naqty qajettilikterin eskerýge múmkindik beredi.
Joba aıasynda turǵyndardyń quqyqtyq kómekke qol jetkizýine erekshe kóńil bólinedi. Osy maqsatta Almatynyń ártúrli aýdanynda aı saıyn keminde segiz qabyldaý uıymdastyrylady. Onda turǵyndar zańgerlerden tegin keńes alyp, ózderin tolǵandyrǵan quqyqtyq máseleler boıynsha qajetti aqparat pen túsinikteme ala alady.
Qabyldaýlardyń ótetin orny men ýaqyty týraly málimetter joba paraqshalarynda turaqty túrde jarııalanyp otyrady. Sonymen qatar azamattar úshin jedel jeli men chat-bot jumys isteıdi.
Eske salaıyq, buǵan deıin Almatyda kóppáterli turǵyn úılerdi basqarý organdaryna baqylaý kúsheıtilip, bıyl shamamen 300 tekseris júrgizý josparlanyp otyrǵanyn habarlaǵan edik.
