Almaty turǵyndary múgedektikti belgileýge onlaın jazyla alady
ASTANA. KAZINFORM — Endi Almaty qalasynyń turǵyndaryna medıtsınalyq-áleýmettik saraptama (MÁS) bólimine barý ýaqytyn onlaın-brondaý múmkindigi qoljetimdi bolady, dep habarlaıdy ńbek jáne halyqty áleýmettik qorǵaý mınıstrligi.
«Múgedektikti jáne/nemese eńbek etý qabiletinen aıyrylý dárejesin belgileý jáne/nemese qajetti áleýmettik qorǵaý sharalaryn aıqyndaý» memlekettik qyzmet kórsetý kezinde elektrondyq kezekti engizý jónindegi pılottyq jobany aýqymdaý jumystary bastaldy.
Eńbekmıni, Densaýlyq saqtaý mınıstrligi, Jasandy ıntellekt jáne tsıfrlyq damý mınıstrligi birlesken buıryǵynyń tıisti jobasy «Ashyq NQA» portalynda ornalastyrylǵan.
Buǵan deıin pılottyq joba Aqmola oblysynda sátti bastalǵan bolatyn. Onyń oń nátıjeleri men azamattarǵa yńǵaılylyǵyn eskere otyryp, tájirıbeni eldiń eń iri megapolısteriniń birine keńeıtý týraly sheshim qabyldandy.
— Elektrondyq kezekti engizý MÁS bólimderindegi kezekterdi joıýǵa, kútý ýaqytyn qysqartýǵa jáne qyzmet kórsetý protsesiniń ashyqtyǵyn qamtamasyz etýge baǵyttalǵan. Azamattar yńǵaıly kún men ýaqytty tańdap, saparlaryn aldyn ala josparlaı alady, — delingen habarlamada.
Jazylý áleýmettik qyzmetter portaly arqyly júzege asyrylady (aleumet.egov.kz). Protsedýra múmkindiginshe jeńildetilgen:
- Avtorızatsııa: paıdalanýshy aleumet.egov.kz portalǵa kiredi jáne ETsQ kómegimen (mobıldi qosymshada SMS arqyly) avtorlandyrýdan ótedi.
- Qyzmetti tańdaý: Jeke kabınette kýálandyrýǵa jazylý qyzmetin tańdaıdy.
- Brondaý: aýmaqtyq ornalasýy boıynsha MÁS bólimine avtomatty túrde jiberiledi, bos kún men ýaqytty tańdaıdy.
- Rastaý: sátti brondaýdan keıin kórsetiletin qyzmetti alýshynyń telefon nómirine (mobıldi azamattar bazasynda tirkelgen) SMS-habarlama kelip túsedi. Onda bólimniń meken-jaıy, jazylǵan kúni, ýaqyty, jáne talon nómiri kórsetiledi.
- Eskertý: jazýdan úsh kún buryn júıe («MODB» ATsS) qaıta SMS-habarlama (eske salý úshin) jiberedi.
Sondaı-aq, qajet bolǵan jaǵdaıda Jeke kabınet arqyly brondaýdy joıý múmkindigi qarastyrylǵan.
Belgilengen ýaqytta kelmegen jaǵdaıda bron avtomatty túrde joıylady, bul týraly habarlama da keledi.
Pılotty aýqymdaý týraly buıryqtyń jobasy «Ashyq NQA» portalynda jarııa talqylaý úshin 2026 jylǵy 19 naýryzǵa deıin qoljetimdi.
Budan buryn jyl basynan beri múgedektikti belgileýge qatysty 9 myńnan astam ótinim syrttaı formatta qaralǵanyn jazǵanbyz.
