Almaty turǵyndary qar shyǵarý máselesi boıynsha qaıda habarlasa alady

ALMATY. KAZINFORM – Almatyda kommýnaldyq qyzmet qar shyǵarý jumystaryn jalǵastyryp otyr. 6 aqpan kúni qala aýmaǵynda 6 sm qar jaýsa, taýly aımaqtarda qar qalyńdyǵy 10 sm-ge deıin jetti. 

Qala ákimdiginiń málimetinshe, avtokóliktiń emin-erkin qozǵalysyn qamtamasyz etý jáne kóshe-jol jelisin ýaqytyly tazalaý maqsatynda kommýnaldyq qyzmet kúsheıtilgen daıyndyq rejımine kóshirildi. Bul jumysqa 2,2 myń jol salasy jumysshysy tartylyp, 1,3 myń birlik arnaıy tehnıka jumyldyryldy.

– Trotýarlar men qoǵamdyq oryndardy tazalaýǵa 95 shaǵyn gabarıtti tehnıka tartylyp, kóktaıǵaqqa qarsy materıaldar sebilip jatyr. Taýly aımaqtarda qar kúreýge arnalǵan úsh kolonna jasaqtaldy. Qar tazalaý jumystary táýlik boıy júrgizilip jatyr, - delingen habarlamada.

Qar shyǵarý máselesi boıynsha turǵyndar Almaty ákimdiginiń qoǵamdyq qabyldaýy – Open Almaty-ge habarlasa alady:

• 1308 nómiri arqyly;
• Facebook jáne Instagram jelilerindegi @openalmaty resmı paraqshalary arqyly.

Ákimdik áleýmettik jeliler arqyly túsken ótinishter dereý qabyldanyp, qaralatynyn málimdedi.

Eske salaıyq, buǵan deıin Astana turǵyny jınalǵan qardan túrli músin jasap, jurtty tánti etip júrgenin jazǵanbyz.