Almaty turǵyndary qandaı medıtsınalyq máselelerge jıi shaǵymdanady
ALMATY. KAZINFORM — Qaladaǵy medıtsınalyq uıymdar men dárilik zattardyń aınalymyna baqylaý kúsheıtilip jatyr. Bıylǵy І toqsanda Tekserý qorytyndysy boıynsha ondaǵan nysan ákimshilik jaýapkershilikke tartylyp, salynǵan aıyppuldyń jalpy somasy 18 mıllıon teńgeden asyp tústi.
Bul týraly Óńirlik kommýnıkatsııalar qyzmetinde Almaty boıynsha Medıtsınalyq jáne farmatsevtıkalyq baqylaý komıteti departamentiniń basshysy Damır Dáýletbaev aıtty.
Onyń sózinshe, bıylǵy І toqsanda departamentke medıtsınalyq kómektiń sapasyna qatysty azamattardan 1 280 ótinish kelip túsken. Bul byltyrǵy osy ýaqytpen salystyrǵanda 16,5% az. Onyń ishinde 351 ótinish qaralyp, 18 jaǵdaı boıynsha medıtsınalyq uıymdarǵa jospardan tys tekserý júrgizilgen. Turǵyndar kóbinese medıtsınalyq kómektiń sapasyna, qyzmetti uıymdastyrý men dárigerlerdiń etıkasy men deontologııasy máselesi boıynsha júgingen.
Medıtsınalyq qyzmettiń sapasyn baqylaý salasynda azamattardyń ótinishi men memlekettik organdar materıaldary negizinde 103 jospardan tys tekserý júrgizildi. Tekserý nátıjesinde shamamen 2 mıllıon teńge kóleminde 19 ákimshilik hattama toltyrylyp, 37 zańbuzýshylyqty joıý týraly nusqama berildi. Sonymen qatar materıaldar quqyq qorǵaý organyna joldandy. Budan bólek, departament medıtsınalyq kómektiń sapasyna qatysty 13 ótinish boıynsha azamattardy jeke qabyldaǵan.
Dárilik zattar men medıtsınalyq buıymdardyń aınalymyna da baqylaý kúsheıdi. Osy ýaqytta tirkelmegen preparattardy satý, shekti baǵadan asyrý, lıtsenzııasyz qyzmet júrgizý men merzimi ótip ketken dárilerdi ótkizý faktisi boıynsha 89 tekserý ótkizildi.
Baqylaýdyń qorytyndysy boıynsha jalpy somasy 16 mıllıon teńgeden asatyn 59 ákimshilik is qozǵaldy.
Damır Dáýletbaev stomatologııalyq uıymdardy tekserý máselesi týraly da aıtty. Prokýratýra organdarynyń talaby boıynsha 92 stomatologııalyq mekemeniń qyzmetine taldaý jasalyp, 85 uıymda tekserý uıymdastyrylǵan.
— Tekserý nátıjesinde 46 sýbekt ákimshilik jaýapkershilikke tartylyp, 63 ákimshilik hattama toltyryldy. Sondaı-aq 18 lıtsenzııanyń kúshi qaıtarylyp alyndy nemese ýaqytsha toqtatyldy, — dedi departament basshysy.
Eske salaıyq, buǵan deıin densaýlyq saqtaý salasyndaǵy sybaılas jemqorlyq úsh jylda 70%-dan astam kórsetkishke tómendegenin habarlaǵan edik.
