Almaty turǵyndary alǵashqy qardan keıin jaryqsyz otyr

ALMATY. KAZINFORM – 5 qarasha kúni Almatyda qolaısyz aýa raıynyń saldarynan elektr qýaty óshti. «Alataý Jaryq Kompanııasy» AQ habarlaýynsha, ekpini kúshti jel, jańbyr men sýly qardyń áserinen qala aýmaǵynda jaryq berý ýaqytsha toqtady.

Elektr qýaty birneshe aýdanda óshti:

• Bostandyq aýdanynda – Táýke han, Jańarý, Ladýshkın, Baıqońyr kósheleri men Ermensaı, Baǵanashyl jáne Asqartaý shaǵynaýdandary;

• Áýezov aýdanynda – Aqsaı-5, Dostyq, Jetisý-2 shaǵynaýdandary;

• Naýryzbaı aýdanynda – Aqjar jáne Tastybulaq shaǵynaýdandary;

• Almaly aýdanynda – Manas, Abaı, Áýezov jáne Jambyl kósheleri.

Kompanııanyń málimetinshe, aqaýlardyń negizgi sebebi – ekpindi jel men ylǵaldy qardyń áserinen elektr jelileriniń úzilýi jáne qysqa tuıyqtalý jaǵdaılary.

Qazirgi tańda apattyq-qalpyna keltirý jumystaryna segiz jedel-attaný brıgadasy, áýe jelilerin qyzmet kórsetetin eki brıgada jáne eki arnaıy tehnıka birligi jumyldyryldy. Sonymen qatar aýdandyq elektr jelileriniń jáne Ortalyq dıspetcherlik qyzmettiń kezekshi mamandary jumys istep jatyr.

Kompanııanyń Kazinform tilshisine bergen keıingi málimetine sáıkes, qazir Aqjar, Tastybulaq, Aqsaı-5 shaǵynaýdandarynda jáne Manas, Abaı, Áýezov jáne Jambyl kóshelerinde jaryq qaıta berildi.

«Alataý Jaryq Kompanııasy» turǵyndardan keltirilgen qolaısyzdyqtar úshin keshirim surap, túsinistik tanytýdy ótindi.

– Barlyq kúsh-jiger elektr energııasyn múmkindiginshe tez qalpyna keltirýge baǵyttalǵan. Jaryq jelilerdegi jóndeý jumystary aıaqtalǵannan keıin kezeń-kezeńimen beriledi, - delingen habarlamada.

Eske salaıyq, keshe, 4 qarasha kúni keshke Almatyda alǵashqy qar jaýǵanyn jazǵanbyz.

Almatyda túnde jaýǵan qardan keıin 17 jol-kólik oqıǵasy tirkeldi.