Almaty turǵyndary 653 saılaý ýchaskesinde daýys berip jatyr
ALMATY. KAZINFORM — Almatyda jalpyulttyq referendým boıynsha daýys berý bastaldy.
Qaladaǵy saılaý ýchaskeleri saǵat 07:00–de ashyldy. Keıbir ýchaskelerde daýys berý aýmaqtyq saılaý komıssııalarynyń sheshimimen 06:00–de bastaldy, bul — áskerı bólimderde ornalasqan ýchaskeler.
Redaktsııa tilshisi № 254 saılaý ýchaskesinde jumys istep jatyr. Ol Qazaqstan Respýblıkasynyń Ulttyq kitaphanasy ǵımaratynda ornalasqan. Mundaǵy saılaýshylar belsendi. Kireberiste azamattardy polıtsııa qyzmetkerleri metall izdegish quraldar arqyly tekserip jatyr.
Ýchaskede saılaý komıssııasynyń múshelerinen bólek, baqylaýshylar men buqaralyq aqparat quraldarynyń ókilderi de bar.
Ýchaskeniń jumysy Qazaqstan Respýblıkasynyń Memlekettik ánuranyn oryndaýmen bastaldy. Alǵashqylardyń biri bolyp daýys bergenderdiń arasynda qala turǵyny Dına Dıveeva da bar.
— Búgin mańyzdy saıası oqıǵa. Eliniń jaýapty azamaty retinde men tańerteń erte kelip, daýysymdy berdim. Bul — meniń azamattyq mindetim ári jaýapkershiligim. Saılaýdy ótkizip almaýǵa tyrysamyn jáne árdaıym daýys berýge qatysamyn, — dedi ol.
№ 254 ýchaskelik saılaý komıssııasynyń tóraıymy Ǵızıza Nurǵalıevanyń aıtýynsha, daýys berýdi ótkizý úshin barlyq qajetti jaǵdaı jasalǵan. Bul ýchaskede 1 763 saılaýshy tirkelgen. Densaýlyǵyna baılanysty eki adam úıde daýys beredi, taǵy tórt adam daýys berý quqyǵyn rastaıtyn kýálik alǵan.
— Bizdiń ýchaskede 18 jasqa tolǵan tórt saılaýshy bar, al shamamen 400 adam — 18 ben 35 jas aralyǵyndaǵy jastar. Turǵyndar belsendi qatysady dep kútemiz. Alǵash kelgen 20 saılaýshyǵa estelik kitaptar men shokoladtar tabystalyp jatyr. Ýchaskede komıssııanyń jeti múshesi jumys isteıdi, biz barlyq saılaý normasyn qatań saqtaımyz, — dedi ol.
Jalpy Almatyda 653 saılaý ýchaskesi jumys istep tur. Qalada barlyq azamattyń daýys berýine qatysýyna qolaıly jaǵdaı jasaýǵa erekshe kóńil bólingen. Kórý qabileti buzylǵan azamattar úshin bıýlletenderge arnalǵan Braıl qarpimen jazylǵan arnaıy trafaretter daıyndaldy, al daýys berý kabınalary erekshe qajettiligi bar adamdarǵa beıimdelgen. Sonymen qatar ýchaskelerde tsıfrlyq qoldaý uıymdastyrylyp, onlaın sýrdoaýdarmashylar estý qabileti buzylǵan azamattarǵa qajetti aqparat alýǵa kómektesedi.
Múgedektigi bar adamdardyń ýchaskelerge barýyn jeńildetý úshin «Invataksı» qyzmeti de iske qosyldy.
Bul qyzmet turǵyndardyń saılaý ýchaskelerine kedergisiz jetýine múmkindik beredi. Al jasy úlken nemese densaýlyǵyna baılanysty ýchaskege kele almaıtyn azamattar úshin úıde daýys berý uıymdastyrylǵan. Saılaý komıssııasynyń músheleri kóshpeli jáshiktermen turǵyndardyń mekenjaıyna barady.