Almaty túni: turǵyndardyń záresi ushyp, kúshtik qurylymdar tikesinen tik turdy

ALMATY. KAZINFORM – Tótenshe jaǵdaılar mınıstrligine qarasty «STÁK» JShS-nyń seısmıkalyq stansalar jelisi Almaty ýaqytymen 23 qańtar kúni 00 saǵat 09 mınýtta jer silkinisin tirkedi. Jerasty dúmpýi Almatydan ońtústik-shyǵysqa qaraı 264 shaqyrym jerde, Qazaqsten men Qyrǵyzstan shekarasy aýmaǵynda boldy.

Energetıkalyq sanaty – 15.1. MPV terbelisi – 6.7. Tereńdigi – 65 km.

Jer silkinisi Almatyda 5 ball deńgeıinde (MSK-64 shkalasy boıynsha) sezildi.

Almatylyqtardyń aıtýynsha, jerasty dúmpýi osy joly qatty sezildi. Uzaq ýaqyt boıy shaıqalǵan. Turyǵyndar úreılenip, úıinen kóshege, dalaǵa shyqty.

Almaty qalalyq Tótenshe jaǵdaılar departamentine jer silkinisi kezinde ǵımarattardyń qıraǵany jáne adamdardyń zardap shekkeni týraly aqparat túsken joq.

«Ǵımarattardyń qıraýy men zardap shekkender týraly aqparat túsken joq. Tynyshtyq saqtaýlaryńyzdy suraımyz. Qaýipsizdik maqsatynda kelesi eskertýge deıin dalaǵa shyǵý kerek», - dedi Almaty qalalyq Tótenshe jaǵdaılar departamentiniń basshysy Nurlan Atyǵaev. 

Megapolıste dereý barlyq jınalý núktesi ashyldy. Barlyq málimet 2GIS Almaty platformasynda ornalasqan. Іzdeý kezinde «zardap shekken halyqty qabyldaý pýnkti» dep terseńiz, kartadan halyq jınalatyn oryndar kórsetiledi. Mundaı derekter Almaty qalasy TJD jáne aýdandyq ákimdikterdiń resmı saıtynda qoljetimdi.

Almaty qalalyq polıtsııa departamenti atap ótkendeı, patrýldik polıtsııanyń sany ulǵaıtylyp, ýchaskelik ınspektorlarynyń turǵyn úılerdi aralaýy uıymdastyryldy. Sonymen qatar, tártip saqshylary azamattardy úıleriniń esigin kilttep jabýǵa shaqyrady.

Shahardaǵy seısmıkalyq jaǵdaıǵa baılanysty, Erbolat Dosaev jedel shtabtyń shuǵyl keńesin ótkizdi. Onda mamandar is-qımyl josparyn talqylady.

Almaty turǵyndary qatty jer silkinisinen keıin, qaladan jappaı kete bastady. Kóshelerde úlken keptelis paıda bolyp, janarmaı quıý beketterinde uzyn-sonar kezek qalyptasty. Sondaı-aq, taksı baǵasy bir sapar úshin 5 myń teńgeden 20 myń teńgege deıin kóterildi.

Ulttyq seısmologııalyq baqylaýlar men zertteýler ǵylymı ortalyǵynyń dırektory Dáýlet Sársenbaev Almatyda jaqyn ýaqytta joıqyn jer silkinisi bolmaıdy dep sendirdi.

«Almatynyń turǵyndary men qonaqtaryn jaqyn arada joıqyn jer silkinisi kútilmeıtinine sendirgim keledi. Búgin bolǵan seısmıkalyq oqıǵa QHR men Qyrǵyzstan Respýblıkasynyń aýmaǵynda boldy. Almaty men Almaty oblysynyń turǵyndary, Jetisý oblysynyń bir bóliginde sezilgen silkinister «aftershok» bolyp tabylady. Ortalyq Azııanyń barlyq derlik elderi seısmıkalyq oqıǵany sezindi. Qazirgi ýaqytta 10-nan astam aftershok tirkeldi, onyń ishinde Almaty turǵyndary 2 aftershokty sezindi. Baıbalamǵa salynýdyń eshqandaı sebebi joq», - dedi ol.

Áleýmettik jelilerde Ál-Farabı atyndaǵy Qazaq ulttyq ýnıversıtetiniń jataqhanalary qırady degen aqparat shyqty.

Almatydaǵy stýdenttik jataqhanalarda jaǵdaı turaqty ekenin Ǵylym jáne joǵary bilim mınıstrligi habarlady.

Almaty halyqaralyq áýejaıynyń baspasóz qyzmeti, áýejaı shtattyq rejımde jumys istep jatqanyn, áýe kólikterin qondyrýǵa jáne ushyrýǵa eshqandaı shekteýler joq ekenin jetkizdi.

Ońtústik astanada qoǵamdyq tártipti 2,5 myńnan astam polıtsııa qyzmetkeri qamtamasyz etýde. Patrýldik polıtsııa qyzmetkerleri, ýchaskelik ınspektorlar men jedel bólimsheler qyzmettiń kúsheıtilgen rejımine aýystyryldy. Tergeý-jedel toptary kúsheıtildi.

«Almatyda jedel jaǵdaı turaqty, qylmystyń órshýi baıqalmaıdy. Azamattar arasynda túsindirme jumystary kúsheıtilip, óz múlikteriniń saqtalýyn qamtamasyz etý jaıynda aıtyldy. Tonaý derekteri tirkelgen joq», - dep habarlady vedomstvodan.

Qazirgi ýaqytta megapolıste jaǵdaı turaqty.