Almaty tsırki men qalalyq zoobaqtyń jańa jobasy 100 mln teńgege ázirlenip jatyr
ALMATY. KAZINFORM — Bul týraly Almatyda qalalyq máslıhattyń kezekti XXVIII sessııasynda aıtyldy.
Almaty qalasy Qarjy basqarmasynyń basshysy Qanat Sýhambekov máslıhat depýtattarynyń aldynda 2025 jylǵa arnalǵan alǵashqy naqtylanǵan bıýdjettiń jobasyn tanystyrdy.
Ol qalanyń mádenı nysandaryn damytý maqsatynda Almaty tsırki jáne qalalyq zooparkti jańǵyrtýǵa erekshe kóńil bólinetinin atap ótti. Aıtýynsha, asy jobalardy júzege asyrý úshin 100 mln teńgege eki jobalaý-smetalyq qujattama ázirlenip jatyr.
Odan bólek Qanat Sýhambekov N.Sats atyndaǵy balalar men jasóspirimderge arnalǵan memlekettik akademııalyq teatrdy qaıta qurý jobasyna toqtaldy.
— Bıyl teatrdyń 80 jyldyǵy jáne bul joba onyń mádenı murasyn saqtaý men damytý úshin mańyzdy qadam bolmaq. Qaıta qurý jumystary aıasynda 5 mlrd teńge kózdelgen, jańǵyrtý jumystary kórermender men ártister úshin jańa múmkindikter ashady. Jobanyń jalpy somasy 24,2 mlrd teńge, — dedi ol.
Eske salaıyq, buǵan deıin N. Sats atyndaǵy teatrdy jóndeýge 21,7 mlrd teńge bólingenin jazǵanbyz.