Balqashta sibir jarasyna kúdik rastalmady
BALQASh. KAZINFORM - Balqashta medıtsınalyq kómekke júgingen naýqastan bastapqyda sibir jarasynyń teri túrine kúdik bolǵan. Alaıda júrgizilgen PTR-zertteý nátıjesinde dıagnoz rastalmady, dep habarlady Qaraǵandy oblysynyń densaýlyq saqtaý basqarmasy.
Vedomstvonyń málimetinshe, naýqas Balqash qalasynyń kópbeıindi aýrýhanasyna júgingen. Aldyn ala qoıylǵan dıagnoz eskerilip, ol ınfektsııalyq bólimshege jatqyzylǵan.
– Balqash qalasynyń aýrýhanasyna naýqas júgindi. PTR-zertteý nátıjesinde sibir jarasy dıagnozy rastalǵan joq. Qazirgi ýaqytta jaǵdaı tıisti qyzmetterdiń baqylaýynda. Turǵyndardy alańdatýǵa negiz joq, – dep habarlady Qaraǵandy oblysynyń densaýlyq saqtaý basqarmasy.
Qajetti sanıtarııalyq-epıdemııaǵa qarsy is-sharalar aıasynda naýqaspen baılanysta bolǵan adamdar anyqtaldy. Jaǵdaı týraly aqparat aýmaqtyq sanıtarııalyq-epıdemıologııalyq baqylaý departamentiniń tıisti bólimshesine de joldandy.
Buǵan deıin Qyzylorda oblysynda sibir jarasy jerlengen 57 oshaq bar ekeni habarlanǵan bolatyn.
Buǵan deıin Qyzylordadaǵy orny anyqtalmaǵan sibir jarasynyń kómindileri reestrden alynýy múmkin dep habarlanǵan bolatyn.
