Almaty telemunarasy Táýelsizdik kúni qarsańynda jańa keıipke endi
ALMATY. KAZINFORM — Qazaqstan Respýblıkasynyń Táýelsizdik kúnine oraı Almatynyń Bostandyq aýdanynda Sátbaev pen Jeltoqsan kósheleriniń qıylysynda ornalasqan bıiktigi 200 metr teleradıo habaryn taratatyn munaranyń sáýlettik jaryqtandyrý jobasy tolyq aıaqtaldy.
Almaty ákimdiginiń habarlaýynsha, jańartylǵan jaryqtandyrý qaladaǵy eń tanymal ınjenerlik nysandardyń biri sanalatyn telemunaranyń biregeı qurylymyn aıqyndap, ony megapolıstiń keshki kelbetiniń aıshyqty núktesine aınaldyrdy.
— Osylaısha, nysan tek qalalyq ınfraqurylymnyń fýnktsıonaldyq bóligi ǵana emes, sonymen qatar Almatynyń zamanaýı sáýlettik jaryqtandyrýynyń mańyzdy elementine aınaldy. Joba aıasynda zamanaýı jaryq projektorlaryn ornatý, jańa kabel jelilerin tartý, sondaı-aq ártúrli jaryq úlgilerin jasaýǵa múmkindik beretin ıntellektýaldy basqarý júıesin engizý boıynsha keshendi jumys isteldi, — delingen habarlamada.
Eske salaıyq, buǵan deıin Almatydaǵy teleradıo munarasyna jańa sáýlettik jaryq ornatylyp jatqanyn jazǵanbyz.
Almatyda Táýelsizdik kúnine oraı qandaı is-sharalar ótetinin habarlaǵanbyz.