Almaty taýlaryndaǵy týrısterge arnalǵan úıshikterdiń jaı-kúıi qalaı

ALMATY. KAZINFORM – Almaty taýlarynda tótenshe jaǵdaıǵa tap bolǵan týrısterge arnalǵan 18 qutqarý kúrkesi bar. Olardyń búgingi jaǵdaıy qandaı jáne aldaǵy ýaqytta sany arta ma? Kazinform tilshisi anyqtap kórdi.

Taýdaǵy úıshikter 2021-2023 jyldary eń tanymal ári qaýipti baǵyttarda ornatyldy. Olardyń negizgi mindeti – qolaısyz aýa raıy kezinde adamdarǵa pana bolyp, kúsh jınaýǵa jáne qutqarýshylar kómegin kútýge múmkindik berý. 

Alaıda bul nysandarda vandalızm faktiler bolyp turady. Adamdar bul týraly áleýmettik jelide birneshe ret jazǵan edi. Mysaly, kúrkelerdiń birinde bolat esik julynyp, terezesi shaǵylǵan, sondaı-aq matrasty órteý áreketteri anyqtalǵan.

Osy mańyzdy nysandardy teńgerimine alǵan Almaty qalasynyń qutqarý qyzmeti agenttik saýalyna bergen jaýabynda múlikti búldirý derekteriniń rasymen de kezdesetinin rastady.

– Mundaı derekter qyzmetkerler qordy tolyqtyrýǵa jáne tazalyq jumystaryn júrgizýge barǵan kezde anyqtalady. Buǵan deıin qural-jabdyqtardyń, sonyń ishinde pesh pen kún panelderiniń synýy sııaqty jaǵdaılar bolǵan, - dep habarlady 109 qyzmeti.

Foto: 2gis

Qutqarýshylar týrısterden úıshikterdi uqypty qaraýǵa shaqyryp, olardyń tek tótenshe jaǵdaılarǵa arnalǵanyn eskertti. Sondaı-aq vedomstvo onda beınebaqylaý ornatý óte qıyn ekenin túsindirdi.

– Kóptegen núktede beınebaqylaý kameralaryn ornatý – nysandardyń tym alystyǵyna, turaqty baılanystyń joqtyǵyna jáne sıgnal berýge qajetti tehnıkalyq ınfraqurylymnyń tapshylyǵyna baılanysty qıyndyq týdyrady, - dep atap ótti vedomstvodan.

Soǵan qaramastan úıshikterdiń jaǵdaıy turaqty baqylaýda. Qutqarýshylar taýly aımaqtardy aralap, tikushaqpen barlap, tehnıkalyq kúıin tekseredi jáne qajet bolǵan jaǵdaıda qordy tolyqtyrady. Orta eseppen mundaı jumystar toqsanyna bir ret ótkiziledi. Kúrkelerdi kútip ustaý qutqarý qyzmetiniń jumysyn qamtamasyz etýge arnalǵan qarjy esebinen júzege asyrylady.

Foto: Qutqarý qyzmeti

Úıshikter qandaı zattarmen jabdyqtalǵan

Týrıstik úıshikterdiń ishinde adam ómirine qajetti jáne qaýipsizdikti qamtamasyz etetin jıyntyq bar:

• matras pen kórpeler;

• jylynýǵa arnalǵan pesh;

• alǵashqy medıtsınalyq kómek qobdıshasy;

• azyq-túlik qory;

• qurylǵylardy qýattaý núktesi;

• avtonomdy energııamen qamtamasyz etetin kún panelderi.

Jabdyqtar qutqarýshylar kelgenshe nemese aýa raıy jaqsarǵansha qysqa merzimdi aıaldaýǵa eseptelgen.

Búginge deıin bul nysandardy paıdalanǵan týrısterdiń naqty sany belgisiz. Qutqarý qyzmetiniń málimetinshe, taýǵa shyqqan adamdardy kóbi óz baǵyttaryn tikrep, úıshikte bolǵandyǵy týraly habarlamaıdy.

Kúrkeler qaı jerde ornalasqan jáne jańalary salyna ma

Qazir qutqarý qyzmetiniń qaramaǵynda 18 týrıstik úıshik bar. Vedomstvo aldaǵy ýaqytta mundaı jańa nysandardy ornatý josparda joq ekenin atap ótti. Mamandardyń baǵalaýynsha, qoldanystaǵy ınfraqurylym qazirgi qajettilikti tolyq óteıdi.

Qutqarý kúrkeleriniń ornalasqan jeri:

• Tuıyqsý muzdyǵynyń shetki morenasy – 3 400 m

• Joǵarǵy Kúıiksaı – 3 205 m

• Ótpeli shatqaly (Karnıznaıa shyńynyń batys betkeıi) – 3 100 m

• Aıly alqap – 2 390 m

• Sol Talǵar shatqaly (Týrıster jáne Dmıtrıev ózenderiniń túıisken jeri) – 2 970 m

• Qyzylsaı shatqaly – 3 560 m

• Úlken Almaty shatqaly (Ozernaıa jáne Ońtústik-Shyǵys ózenderiniń túıisken jeri) – 3 100 m

• Shubararsha alqaby – 2 930 m

• Orta Talǵar shatqaly (Qaraýylshytaý shyńynyń soltústik-batys betkeıi) – 3 000 m

• Túrgen ózeni – 2 680 m

• Shyn-Túrgen ózeni – 2 830 m

• Panorama – 3 060 m

• Kúnshýaq alqaby – 2 630 m

• Bozkól kóli (Esik shatqaly) – 2 650 m

• Korjenevskıı muzdyǵy – 3 750 m

• Kúmbel – 3 170 m

• Býkreev – 2 780 m

• Terra alqaby – 2 650 m

Foto: Aleksandr Pavskıı/ Kazinform

Buǵan deıin Almaty taýlarynda adasqan týrıster osy úıshikterdiń arqasynda aman qalǵanyn jazǵanbyz.