Almaty taýlaryndaǵy 6 morenaldy kól qaýipti
ALMATY. KAZINFORM – Almaty ákimi Darhan Satybaldy, «Qazseldenqorǵaý» mekemesi men Tótenshe jaǵdaılar departamenti basshylyǵy megapolıstiń sel qaýipsizdigin baqylaý jáne monıtorıng júrgizý maqsatynda morenalyq kólderdiń jaı-kúıine aerovızýaldy zertteý júrgizdi.
Tikushaqpen sholý barysynda «Medeý», «Úlken Almaty», «Qarǵaly» sý bógetteri men Aqsaı, Kishi jáne Úlken Almaty ózenderiniń basseınderinde ornalasqan №6, 8, 9, 10 jáne 13-Bıs muzdaq kólderi sekildi negizgi selden qorǵaý nysandary qamtyldy.
Tótenshe jaǵdaılar departamenti, «Qazseldenqorǵaý» jáne Seısmıkalyq qaýipsizdik pen jumyldyrý daıyndyǵy basqarmasy basshylarymen birlesip, aldaǵy jumystar talqylandy.
Qala taýlarynda 51 morendi kól bar, onyń 14-de buzylý qaýpi joǵary bolsa, al 6-y óte qaýipti. Bul kólder halyq tyǵyz qonystanǵan aımaqtar arqyly aǵatyn ózenderdiń bastaýynda ornalasqan.
«Qazseldenqorǵaý» mekemesiniń basshysy Samat Dáýlenqanovtyń aıtýynsha, qaýipti nysandarda sý deńgeıin tómendetý, sıfon jelilerin iske qosý jáne evakýatsııalyq arnalardy tazalaý sekildi aldyn alý sharalary josparlanǵan.
Sondaı-aq baqylaý kúsheıtilip, 31 avtomatty stantsııa, 23 baqylaý beketi men 8 maýsymdyq núkte jumys istep tur. Arnaıy tehnıkamen jabdyqtalǵan jedel is-qımyl toby qurylyp, kezekshilik uıymdastyrylǵan.
Tikushaqpen sholý kezinde gıdrotehnıkalyq qurylystar – bógetter men selden qorǵaý bógetteriniń tehnıkalyq jaǵdaıyna erekshe nazar aýdaryldy. Keıbir nysandarǵa jóndeý nemese qaıta qurý sheshimin qabyldaý úshin jan-jaqty tekseris qajet ekeni anyqtaldy. Sondaı-aq, taýly bólimshelerdi arnaıy tehnıkamen, qural-jabdyqtarmen jáne meteoquraldarmen qosymsha jabdyqtaý qajettiligi aıtyldy.
Marshrýt Almaty taý klasteriniń ortalyq aımaǵy arqyly aıaqtaldy. «Chimbulak Development» JShS dırektory Rınat Ábdirahmanov arqan joldar jelisin keńeıtý, trassalar men ınfraqurylymdy damytý josparyn tanystyrdy.
2028 jylǵa qaraı klasterlik aımaqtyń ótkizý qabileti kúnine 6 myńnan 34 myń adamǵa deıin artpaq. Joba jeke ınvestorlar men halyqaralyq seriktesterdiń qarjysy esebinen júzege asyrylyp jatyr.
Qala basshysy týrızmdi damytý tabıǵı qaýip-qaterlerden almatylyqtar men qala qonaqtaryn qorǵaý sharalarymen tyǵyz baılanysta júrgizilýge tıis ekenin atap ótti.
Osyǵan deıin Almatynyń kommýnaldyq qyzmeti nóser jańbyrǵa baılanysty kúsheıtilgen jumys rejımine kóshkeni týraly jazǵanbyz.