Almaty taýlarynda stýdent qyz qaıtys boldy

ALMATY. KAZINFORM — Bul derek boıynsha polıtsııa tergeý júrgizip jatyr.

2 mamyrda Alma-Arasan shatqalynda taýdan tas qulaǵan bolatyn. Osy oqıǵadan stýdent qyzdyń jaraqat alyp, qaıtys bolǵany týraly aqparat áleýmettik jelide tarady.

Alaıda Almaty qalasynyń Tótenshe jaǵdaılar departamenti agenttik saýalyna jaýap bere otyryp, qyzdyń máıiti «Gorelnık» shatqalyna jaqyn mańda 4 mamyr kúni tabylǵanyn jáne Alma-Arasan shatqalyndaǵy oqıǵaǵa qatysty joq ekenin málimdedi.

Qazirgi ýaqytta bul derek boıynsha Medeý aýdandyq polıtsııa basqarmasy tekserý júrgizip jatyr.

— Oqıǵanyń mán-jaıy anyqtalyp jatyr, — dep habarlady qalalyq polıtsııa departamenti.

Eske salaıyq, buǵan deıin Almaty taýlarynda adasyp ketken eki týrıst qutqarylǵanyn jazǵanbyz.