Almaty taýlarynda sheteldik týrıst joǵaldy: izdeýge tikushaq pen 7 dron ushyryldy
ALMATY. KAZINFORM — Almaty taýlarynda 1953 jyly týǵan shetel azamatyn izdestirý-qutqarý jumystary táýlik boıy jalǵasyp jatyr. Týrıst Talǵar asýy mańynda, shamamen 3200 metr bıiktikte joǵalǵan. Ony izdeýge 50 adam, 8 tehnıka, 7 dron, 3 kınologııalyq top pen tikushaq jumyldyryldy.
Tótenshe jaǵdaılar mınıstrliginiń málimetinshe, shetel azamaty 28 qyrkúıekte týrıster tobymen birge «Shymbulaq» aspaly joly arqyly taýǵa kóterilgen. Keıin ol toptaǵy adamdarǵa marshrýtty ózdiginen jalǵastyryp, qalaǵa ózi qaıtatynyn aıtqan. Alaıda qonaqúıge oralmaǵan.
29 qyrkúıekte onyń joǵalǵany týraly aqparat «112» pýltine túsken. Sol kúni TJM izdestirý-qutqarý jumystaryn bastap, almatylyq Tótenshe jaǵdaılar departamentiniń jedel shtaby quryldy.
Іzdeýge TJM bólimsheleri, Almaty qalasynyń Monıtorıng jáne jedel áreket etý ortalyǵynyń mamandary, izdeýshi ıtter, TJM Respýblıkalyq jedel-qutqarý jasaǵynyń «Barys» toby, polıtsııa qyzmetkerleri jáne «DSS» eriktileri tartylǵan.
Sonymen birge, jetýi qıyn aýmaqtar 7 dronnyń kómegimen tekserilip jatyr. Mamandar beınebaqylaý kameralaryndaǵy jazbalardy qarap, atalǵan aýmaqta bolǵan týrısterden suraý júrgizgen.
QR TJM «Qazavıaspas» tikushaǵy Sol Talǵar, Bogdanovıch muzdyǵy jáne oǵan irgeles shatqaldar aýmaǵyn áýeden sholyp shyqty. Mamandar taý marshrýttary, shyńdar men asýlar baǵyttaryn da tekserip jatyr.
Mınıstrliktiń málimetinshe, taýdaǵy izdeý jumystaryna jer bederiniń kúrdeliligi men bıiktik kedergi keltirip otyr. Qutqarýshylar taýly aımaqty táýlik boıy aralap, týrısti izdeýdi jalǵastyrýda.
Buǵan deıin Shyǵys Qazaqstan oblysynyń Kúrshim aýdanynda Zaısan kóline balyq aýlaýǵa shyǵyp, qaıtyp oralmaǵan eki er adamnyń denesi tabyldy.
