Almaty taýlarynda ot tutatqandarǵa 1,4 mln teńge aıyppul salyndy

ALMATY. KAZINFORM – Almaty taýlarynda ot jaqqan 27 adam ákimshilik jaýapqa tartyldy. Bul týraly óńirlik kommýnıkatsııalar qyzmetinde ótken baspasóz máslıhatynda qalalyq Tótenshe jaǵdaılar departamentiniń memlekettik órt baqylaý basqarmasy bastyǵynyń orynbasary Erkebulan Jumataev málim etti.

«Taýly ormandy jerlerde órttiń aldyn alý maqsatynda mobıldi toptarmen 62 reıd júrgizildi. Onyń barysynda 5 myńnan astam demalýshyǵa jadynama taratyldy. 27 ot jaǵý faktisi toqtatyldy. Jalpy somasy 1,4 mln teńgeden astam somaǵa 27 jeke tulǵa ákimshilik jaýapkershilikke tartyldy», - deıdi ol.

Spıkerdiń sózinshe, reıdtik is-sharalardy júrgizý úshin teplovızorlarmen jáne qulaqtandyrý júıesimen jabdyqtalǵan pılotsyz ushý apparattary (drondar), qulaqtandyrý qurylǵysy, at jáne jaıaý patrýlder qoldanylady.

«Jaz tabıǵı órttiń paıda bolý qaýpi aıtarlyqtaı artatyn ýaqyt ekeni bárińizge belgili. Olar qorshaǵan ortaǵa, ekonomıkaǵa jáne adamdardyń densaýlyǵyna eleýli zııan keltirýi múmkin. Órt qaýiptiligi joǵary kezeńde órtti sóndirýdi qamtamasyz etý úshin Almaarasan shatqalynda órt sóndirý qyzmeti mehanıkalandyrylǵan kúzet uıymdastyrdy. Sondaı-aq, orman-saıabaq jáne taý bókterindegi alaptarda jıyntyq jasaq quryldy, jıyntyq jasaq retinde táýlik saıyn jeke quramnyń 13 adamy jáne 2 birlik tehnıka kezekshilikke alynady», - dedi E.Jumataev.

Sonymen qatar taýly jerlerde órtti sóndirýge Qazavıaqutqarý jáne Qazavıaqorǵaý avıatsııalyq bólimsheleri daıyn. Úlken Almaty, Parhach, ıÝnatskoe jáne Almaty áýejaı kólderinen avıatsııalyq tehnıkamen sý alý múmkindigi qarastyrylǵan.