Almaty taýlarynda qutqarýshylarǵa arnalǵan tikushaq alańy ashyldy
ASTANA. KAZINFORM – Almaty óńiriniń bıik taýly aımaqtarynda qutqarý jumystaryn jedel júrgizýge arnalǵan Air 112 tikushaq alańy jabdyqtaldy. Jańa nysan bıýdjetten tys qarajat esebinen salynǵan, dep habarlaıdy Tótenshe jaǵdaılar mınıstrligi.
Tótenshe jaǵdaılar mınıstri Murat Mýhanov «Qazseldenqorǵaý» memlekettik mekemesiniń nysandaryna jumys sapary barysynda jańa tikushaq alańynyń múmkindikterimen tanysty.
Atalǵan alań qutqarýshylardy, mamandardy jáne qajetti jabdyqtardy bıik taýda ornalasqan muzdaq kólderge jedel jetkizýge múmkindik beredi. Sondaı-aq kólderdegi sýdy qaýipsiz aǵyzý jumystaryn uıymdastyrýǵa arnalǵan.
Jańa nysannyń basty artyqshylyǵy – qutqarýshylardyń jetýi qıyn aımaqtarǵa qysqa ýaqytta bara alýy. Atap aıtqanda, tikushaqpen muzdaq kólderge jetý ýaqyty nebári 10-15 mınýtty quraıdy.
Bul tótenshe jaǵdaı qaýpi týyndaǵan kezde qutqarý bólimsheleriniń jedel áreket etýine jáne yqtımal qaýiptiń aldyn alý sharalaryn ýaqytyly júrgizýine múmkindik beredi.
Sapar barysynda mınıstr Aıýsaı bógetine de bardy. Munda sel qaýpine táýlik boıy monıtorıng júrgiziledi.
Bóget ústinde arnaıy dıspetcherlik pýnkt jumys isteıdi. Onda «Qazseldenqorǵaý» mekemesiniń tórt mamany kezekshilik atqarady. Sonymen qatar gıdrotehnıkalyq qurylys aýmaǵynda baqylaý alańy jabdyqtalǵan.
– Tikushaq alańy bıik taýdaǵy muzdaq kólderge qutqarýshylardy, mamandardy jáne qajetti jabdyqtardy jedel jetkizýge, sondaı-aq kólderdegi sýdy qaýipsiz aǵyzý jumystaryn júrgizýge múmkindik beredi. Muzdaq kólderge ushý ýaqyty nebári 10-15 mınýtty quraıdy. Bul tótenshe jaǵdaı qaýpi týyndaǵan kezde den qoıý tıimdiligin aıtarlyqtaı arttyrady. Infraqurylymdy damytý metsenattardyń qoldaýymen Qazaqstandyq qutqarýshylar qory arqyly bıýdjetten tys qarajat tartý esebinen júzege asyrylýda, – delingen mınıstrlik aqparatynda.
Aldaǵy ýaqytta bıik taýly aımaqtardaǵy avıatsııalyq ınfraqurylymdy odan ári damytý josparlanyp otyr. Sonyń ishinde teńiz deńgeıinen shamamen 3 200 metr bıiktikte taǵy bir tikushaq alańyn jabdyqtaý kózdelgen.
Jobany iske asyrý qutqarý bólimsheleriniń múmkindikterin keńeıtip, jetýi qıyn aýmaqtarǵa qoljetimdilikti jaqsartady. Sondaı-aq tabıǵı qaýip-qaterlerge jedel den qoıýǵa jáne halyqtyń qaýipsizdigin qamtamasyz etýge yqpal etedi.
Aıta keteıik, buǵan deıin Almaty oblysyndaǵy Tómengi Kólsaı kólinde týrısterdiń qaýipsizdigin qamtamasyz etý jáne tótenshe jaǵdaılarǵa jedel den qoıý úshin jańa ámbebap qutqarý pýnkti ashylǵan bolatyn.
