Almaty taýlarynda qutqarý pýnktteri qaıda ornalasqan
ALMATY. KAZINFORM – TJM RJQJ qutqarý bólimshesiniń bas qutqarýshysy Vadım Paktyń aıtýynsha, Almaty taýlarynda bıyl qysta aldyńǵy jyldarǵa qaraǵanda qar qalypty jaýǵan.
– Bıyl qar sırek jaýady, biraq mol túsedi. Qar jaýǵannan keıin bes-alty kún boıy tik betkeılerge, qarly jyraǵa shyǵyp, qardyń astynda turýǵa bolmaıdy, sebebi kez kelgen ýaqytta qar kóshkini bolýy yqtımal, - dedi qutqarýshy Óńirlik kommýnıkatsııalar qyzmetinde ótken brıfıngide.
Onyń aıtýyna qaraǵanda, eńistigi 30-45 gradýstan asatyn betkeıler, qar basqan jerler men qar jaýǵannan keıingi jel jaq betkeıler eń qaýipti aımaqtarǵa jatady. Sondyqtan top bolyp júrgen kezde qaısysy bolsyn ara qashyqtyqty saqtap, qaýipti jerlerden bir-birlep, asa saqtyqpen ótýge tıis.
– Qaýipsizdik tehnıkasyn saqtamaı, jolǵa daıyndyqsyz shyǵyp, qar kóship, úsik shalýy múmkin ekenin kóbi eskere bermeıdi, - dedi Vadım Pak.
Keıingi jyldary qutqarý qyzmetiniń taýdaǵy jumysy kúsheıgen.
– Taýda qutqarý qostary men depolar ornatylyp, jańa kezekshilik pýnktteri ashylyp jatyr. Bul jedel áreket etip, azamattardyń ómirine der kezinde arasha túsip, qaýipsizdigin qamtamasyz etýge múmkindik beredi, - dedi qutqarýshy.
Al Ádilhan Baltabaı qysqy maýsym bastalǵaly beri taýly aımaqta shamamen 20 qutqarý operatsııasy júrgizilip, 25 adam qutqarylǵanyn, bes adamǵa psıhologııalyq kómek kórsetilgenin habarlady.
– Qys kezinde múlde qaýipsiz aımaqtardy bólip kórsetý qıyn, sebebi taýly jerlerdiń árqaısysy ózinshe qaýipti. Ásirese daıyndyqsyz kelip, birden taýǵa bet alatyn týrıster kóp qaýip týdyrady, - dep atap ótti ol.
Ol sonymen qatar Almatynyń taýly aımaqtaryndaǵy qoldanystaǵy qutqarý pýnktteri týraly aqparat berdi.
– Qazirgi tańda qalanyń mamandandyrylǵan taýly aımaqtarynda tórt qutqarý bólimshesi jumys isteıdi, onda qutqarýshylar táýlik boıy kezekshilik atqarady. Pýnktter Tuıyq-Sý lageri aýmaǵynda, «Medeý» taý-shańǵy kýrortynyń aýmaǵynda, Úlken Almaty shatqaly men Shybyndysaı (Býtakovka) shatqalynda ornalasqan, - dedi Ádilhan Baltabaı.
Qutqarýshylar taýǵa shyǵar aldynda ózimen birge azyq-túlik qoryn, dári-dármek, jyly kıim, aýystyratyn aıaq kıim, baılanys quraldary, GPS-qurylǵylar men paýerbank alyp júrý qajet ekenin, sondaı-aq marshrýt pen oralatyn ýaqyty týraly jaqyndaryna eskertip otyrý keregin aıtty. Qar kóshkini qaýpi bar jerler týraly ózekti aqparat Qazaqstan Respýblıkasy Tótenshe jaǵdaılar mınıstrliginiń saıtynda jarııalanǵan.
Eske salaıyq, buǵan deıin Almatyda taýdan qulaǵan týrıst basynan jaraqat alǵanyn jazǵanbyz.