Almaty taýlarynda boıjetken máıiti tabyldy — TJM túsiniktemesi
ASTANA. KAZINFORM — Osy demalys kúnderi Almaty taýlarynda joǵalyp ketken 18 jastaǵy qyzdyń máıiti tabyldy. Marqum 19 jeltoqsan kúni shamamen saǵat 16:00–de ápkesimen sońǵy ret baılanysqa shyqqan.
Oqıǵaǵa baılanysty Tótenshe jaǵdaılar mınıstrligi respýblıkalyq jedel qutqarý jasaǵynyń qutqarý bólimshesiniń bas qutqarýshysy Serǵazy Ábdiqadyr túsinikteme berdi.
— 18 jeltoqsan kúni Tamırıs taýǵa shyqqan. 19 jeltoqsanǵa qaraǵan túni saǵat 01:18–de bizdiń posttan eki top izdestirý jumystaryna attandy. Bir top bazadan Pioneer taý kýrortyna qaraı bet aldy. Sol ýaqytta aýa raıy kúrt nasharlap, qar jaýyp, boran kúsheıip, jeldiń uıytqýy qutqarý jumystaryna aıtarlyqtaı kedergi keltirdi. Qardyń qalyńdyǵy keı jerlerde tizeden asyp, tipti keýdege deıin jetti. Іzdeý jumystaryna 70-ten astam qutqarýshy men eriktiler jumyldyryldy. 20 jeltoqsan kúni Býtakov sarqyramasynyń mańynan marqumnyń máıiti tabyldy, — dedi maman Jibek joly telearnasynyń Búgin LIVE baǵdarlamasynda.
Sonymen qatar Serǵazy Ábdiqadyr taýly aımaqtyń asa qaýipti ekenin atap ótti. Onyń aıtýynsha, taýdaǵy kez kelgen qatelik adam densaýlyǵyna nemese ómirine tikeleı qaýip tóndiredi. Sondyqtan taýǵa shyǵar aldynda aýa raıy boljamyn muqııat tekserip, qaýipsizdik erejelerin saqtaý mańyzdy. Sondaı-aq jalǵyz shyǵýǵa bolmaıdy.
— Býtakov sarqyramasy Pioneer taý kýrortynan alys ornalasqan jáne bul aýmaq snoýbord pen shańǵy tebýge arnalmaǵan. Aldyn ala derekter boıynsha, Tamırıs qaýipsizdik talaptaryn saqtamaý saldarynan qaza tapqan. Qazirgi ýaqytta oqıǵaǵa baılanysty tergep-tekserý jumystaryn polıtsııa departamenti júrgizip jatyr, — dedi ol.
Aıta keteıik, Almaty taýlarynda joǵalyp ketken 20 jastaǵy jigittiń máıiti tabylǵan edi.
Sonymen qatar qutqarýshylar Almaty taýlarynda adasqan eki jasóspirimdi tómenge túsirgen edi.