Almaty taýlarynda bıyl 700 adam qutqaryldy
ALMATY. KAZINFORM — Almatyda taýǵa shyǵatyn týrıster men turǵyndar jyl sanap artyp keledi. Biraq onymen qosa, qutqarýshylardyń kómegine júginetinderdiń sany artqan.
Almaty qalasy TJD basshysy Damır Ermaǵambetovtyń aıtýynsha, jyl basynan beri Almaty qalasynyń taýly aımaqtarynda 430-dan astam izdestirý-qutqarý jumystary júrgizilgen. Nátıjesinde 145 kámeletke tolmaǵan balany qosa alǵanda, shamamen 700 adam qutqarylǵan. Sonymen qatar, 123 adam jaraqat alǵan.
— Taýdaǵy qaýipsizdik ár týrıstiń jaýapkershiliginen bastalady. Jolǵa shyqpas buryn marshrýtty aldyn ala josparlap, aýa raıy jaǵdaıyn eskerip, ózińizdiń fızıkalyq múmkindikterińizdi baǵalaý qajet, — dedi Almaty qalasy TJD basshysy Damır Ermaǵambetov.
Qazir qysqy maýsymǵa qutqarý qyzmetteriniń daıyndyǵyn arttyrý maqsatynda Almatyda jalpy sany 194 adamnan turatyn eki kásibı qutqarý bólimshesi jumys isteıdi. Olardyń qaramaǵynda 60 tehnıka jáne eki tikushaq bar. Odan bólek izdestirý-qutqarý jumystaryna Alpınızm federatsııasy men Erikti qutqarý qyzmetiniń 100-den astam eriktisi tartylady.
Eske salaıyq, Almatyda taýǵa shyǵatyn sapary týraly aldyn ala habarlaýǵa múmkindik beretin Almaty Hike onlaın-servısi iske qosyldy.
