Almaty taýlarynda bıyl 156 adam qutqaryldy

ALMATY. KAZINFORM – Almaty qutqarýshylary taýǵa shyǵatyn týrısterge eskertý jasady.

TJM Respýblıkalyq jedel-qutqarý jasaǵynyń málimetinshe, jyl basynan beri qutqarýshylar 478 jedel shaqyrtýǵa barǵan. Onyń ishinde 167 ret taýly jáne jetýi qıyn aýmaqtarda izdestirý-qutqarý jumystary júrgizilgen. Barlyǵy 156 adam qutqarylǵan, balalar sany - 26. Odan bólek 25 adamǵa alǵashqy medıtsınalyq kómek kórsetilgen.

Respýblıkalyq jedel-qutqarý jasaǵy bólimshesiniń bas qutqarýshysy Vadım Paktyń aıtýynsha, tájirıbesi az týrıster daıyndyqsyz jolǵa shyǵý, baǵytty týystaryna habarlamaý, navıgatsııalyq jáne baılanys quraldarynyń bolmaýy sııaqty birqatar qatelikti jıi jiberedi.

- Taýdaǵy jazataıym jaǵdaılardyń negizgi sebepteri, birinshiden, adamnyń óz kúshin durys baǵalamaýy jáne daıyndyq deńgeıine saı kelmeıtin baǵytty tańdaýy. Sonyń saldarynan týrıst ýaqytynda orala almaıdy nemese baǵyttyń erekshelikterin bilmeı, apatty jaǵdaıǵa tap bolady. Taǵy bir qatelik – qajetti jabdyqtyń bolmaýy. Taýǵa shyǵarda mindetti túrde sómke, qosalqy batareıasy bar sham, paýerbank jáne jyly kıim bolýy kerek. Sebebi taýda qazir salqyn ári qarańǵy tez túsedi, - dedi Vadım Pak.

Odan bólek qutqarýshy ár týrıst dári-dármek qobdıshasyn, jetkilikti sý jáne tamaq ta alyp júrýi tıis ekenin atap ótti.

Eske salaıyq, buǵan deıin Almaty taýlarynda jel men sýyqtan tońǵan úndi stýdentteri qutqaryldy.