Almaty taýlarynda adasyp ketken úsh jasóspirim qutqaryldy
ASTANA. KAZINFORM – Tótenshe jaǵdaılar mınıstrliginiń qutqarýshylary Almaty mańyndaǵy taýda adasyp ketken úsh jasóspirimge kómek kórsetti.
Vedomstvo málimetinshe, oqıǵa Skalıstyı shyńy aýdanynda bolǵan.
2008 jyly týǵan jasóspirimderdiń biri taýǵa kóterilý kezinde soqpaqtan jańylyp, ózdiginen baǵytyn jalǵastyra almaǵan. Oqıǵa ornyna jedel jetken Qutqarý qyzmetiniń mamandary ony jáne janyndaǵy taǵy eki jasóspirimdi qaýipsiz jerge alyp shyqty.
– Qutqarýshylar jasóspirimderdi «Alma-Arasan» ekobeketine deıin aman-esen jetkizdi. Olarǵa medıtsınalyq kómek qajet bolǵan joq, – dep habarlady mınıstrlikten.
TJM azamattardy taýǵa shyǵar aldynda baǵytty aldyn ala josparlap, aýa raıy boljamyn eskerýge jáne qarańǵy túskenge deıin qaıtý ýaqytyn esepteýge shaqyrdy.
– Sondaı-aq ózińizben birge tolyq qýattalǵan uıaly telefon men qolsham alyp júrý jáne baratyn baǵytyńyz týraly jaqyndaryńyzǵa aldyn ala habarlaý mańyzdy, – dep eskertti vedomstvo.
Aıta keteıik, ShQO-daǵy Buqtyrma sý qoımasynda eki áıel qutqaryldy.
