Almaty taýlarynda adasyp ketken eki týrıst qutqaryldy
ALMATY. KAZINFORM – Qutqarýshylar Almaty taýlarynda adasyp ketken eki jas týrıstti taýyp, aman-esen evakýatsııalady, dep habarlaıdy Kazinform agenttiginiń tilshisi.
Tótenshe jaǵdaılar qyzmetine oqıǵa týraly dabyl 4 mamyrǵa qaraǵan túni kelip tústi. 2004 jyly týǵan eki jas jigit Medeý aýdanyndaǵy Qumbel shyńynan óz betimen túse almaı, kómekke muqtaj ekenin habarlady.
Oqıǵa ornyna Qazaqstan Respýblıkasy Tótenshe jaǵdaılar mınıstrliginiń Respýblıkalyq jedel-qutqarý jasaǵynyń jedel toby jóneltildi. Іzdestirý-qutqarý operatsııasynda ushqyshsyz ushatyn apparat pen spýtnıktik baılanys quraldary paıdalanyldy. Qutqarýshylar qarańǵylyq pen qıyn taý relefine qaramastan Kókjaılaý trassasynan shyńǵa deıin jaıaý júrip ótti.
Týrıster 2 850 metr bıiktikten tabyldy. Olar medıtsınalyq kómekti qajet etpedi. Tekserýden keıin qutqarýshylar qalalyq qutqarý qyzmetimen birlese otyryp, Ekopostqa deıin ilesip, jastar sol jerden óz betinshe úılerine tarady.
Eske sala keteıik, buǵan deıin qutqarýshylardyń taýda joǵalyp ketken 2 balany izdep tapqanyn habarlaǵan edik.