Almaty taýlarynda 5 jylda 500-ge jýyq týrıske kómek kórsetilgen
ALMATY. KAZINFORM — Almaty taýlarynyń týrıster úshin tartymdylyǵy jyl saıyn artyp keledi. Biraq soǵan qaraı taýdaǵy tótenshe jaǵdaılar sany da ósip jatyr.
TJM Respýblıkalyq jedel-qutqarý jasaǵynyń qutqarý bólimshesiniń basshysy Vadım Pak týrısterdiń qatelikteri jáne ómirdi saqtap qalýǵa múmkindik beretin saqtyq sharalary týraly aıtyp berdi.
Onyń sózinshe, jaz kezinde taýlarda kómek suraǵan adamdardyń sany kóbeıedi. Sebebi osy ýaqytta adamdar tabıǵatqa jıi shyǵyp, demalys ótkizedi. 2020-2024 jyldar aralyǵyndaǵy statıstıkaǵa sáıkes, eń kóp jazataıym oqıǵalar jazda tirkeldi — 206 jaǵdaı. Kóktemde 75 oqıǵa, kúzde 74, qysta 58 oqıǵa bolǵan.
Qutqarýshy oqıǵalardyń negizgi bóligi taýly jerlerde bolatynyn atap ótti. Olar: Kishi jáne Úlken Almaty, Býtakovka, Sharyn shatqaly.
2025 jyly 1 qańtardan 15 sáýirge deıin taýlarda 25 oqıǵa tirkelse, onyń 19-ynda adamdar qutqaryldy. Keıingi bes jylda taýda qutqarylǵan adamdardyń jalpy sany 438-ge jetken.
— Taýly jerde qaýip kóp. Birinshisi — klımat, aýa-raıy, jer bederi. Olardy aldyn ala qarap, daıyndalýǵa bolady. Biraq kóbinese týrıster kúrdeli marshrýtqa daıyndalmaı shyqqandyqtan, tótenshe jaǵdaılar týyndaıdy, - dep túsindirdi Vadım Pak.
Onyń aıtýynsha, mektep oqýshylarynyń taýǵa shyǵýy, keıde tipti túnde bókterinde qonýǵa qalýy qaýipti arttyrady. Sondaı-aq jazataıym oqıǵaǵa ákeletin faktorlardyń qataryna taýda alkogoldi ishimdikterdi ishý kiredi. Masań kúıdegi adam ózin basqara almaı, bul qaıǵyly jaǵdaıǵa ákeledi.
— Túnde daıyndyǵy joq týrıster jıi qıyndyqqa tap bolady. Olarda sham, qosalqy batareıalar nemese paýerbank joq. Olar jaryq ýaqytty durys eseptemeıdi jáne qarańǵyda adasyp ketedi, - dedi qutqarýshy.
Onyń sózinshe, taýǵa shyǵatyn ár adam arnaıy daıyndalýy kerek jáne alǵashqy kómek jınaǵy bolǵany jón. Onda qan ketýdi toqtatatyn quraldar, tańǵyshtar, allergııaǵa qarsy preparattar jáne aýyrsynýdy basatyn dáriler bolýy kerek.
Jalpy qutqarýshylar usynǵan derekke sáıkes, jyldyń basynan beri taýda eki adam qaıtys bolǵan. 2020-2024 jyldar aralyǵynda taýda 16 adam kóz jumǵan. Tótenshe jaǵdaılarda tezirek kómekke kelý úshin Medeý aýdanynda 16-shy órt sóndirý bóliminiń bazasynda, Kishi Almaty shatqalyna jaqyn qosymsha beket qurylady.
Eske salaıyq, buǵan deıin Almatyda qar kóshkini saldarynan bir adam qaza taýyp, eki adam jaraqat alǵanyn jazǵanbyz.