Almaty taýlarynda 5 jasóspirim adasyp ketken

ASTANA. KAZINFORM — Almaty taýlarynda joǵalyp ketken bes jasóspirim qutqarýshylardyń jedel áreketiniń arqasynda aman tabyldy, dep habarlaıdy vedomstvonyń baspasóz qyzmeti.

«112» pýltine túsken habarǵa sáıkes, 2009 jyly týǵan jasóspirimder Kúmbel shyńyna kóterilip, keıin «Úsh aǵaıyndy» mańyna (shamamen 3000 metr) túskennen keıin keri qaıtqan. Osydan soń olarmen baılanys úzilgen. Ótinish berýshi — olardyń biriniń ákesi — balasynyń demikpe aýrýy bar ekenin aıtyp, dereý kómek suraǵan.

Іzdestirý jumystaryna Almaty qalalyq TJD Qutqarý qyzmeti, «Barys» respýblıkalyq qutqarý jasaǵy jáne TJM Apattar medıtsınasy ortalyǵynyń dárigerleri jumyldyryldy.

— Bir saǵattan keıin qutqarýshylar jasóspirimder tobyn anyqtady. Ara qashyqtyq shamamen 1,5 shaqyrym bolǵan. Toptaǵy bir jasóspirimniń jaǵdaıy nasharlap, bronhıaldyq demikpe ustamasy bastalǵan. Ol qarda júretin tehnıkamen evakýatsııalanyp, medıtsına qyzmetkerlerine tapsyryldy, — delingen habarlamada.

Qalǵan tórt jasóspirim qutqarýshylardyń súıemeldeýimen jaıaý Kókjaılaý shatqalyna jetkizilip, keıin qalaǵa túsirildi.

Apattar medıtsınasy ortalyǵynyń dárigerleri zardap shekken jasóspirimge reanımobılde alǵashqy medıtsınalyq kómek kórsetip, ıngalıatsııa jasap, keıin úıine jetkizdi.

Qutqarýshylardyń jedel ári úılesimdi jumysynyń arqasynda barlyq jasóspirimniń ómiri men densaýlyǵyna qaýip tóngen joq.

Osyǵan deıin qutqarýshylar Almaty taýlarynda qar kóshkini júrý qaýpi bar ekenin eskertkenin jazǵanbyz.