Almaty taýlarynda 3300 metr bıiktikte shuǵyl qutqarý operatsııasy júrgizildi
ASTANA. KAZINFORM — Almaty qalasynyń Bostandyq aýdanynda, teńiz deńgeıinen 3300 metr bıiktikte ornalasqan Kosmostantsııa mańynda túsý kezinde týrıstik top músheleriniń biri ózin nashar sezindi, dep habarlaıdy TJM baspasóz qyzmeti.
Ótinish berýshiniń aıtýynsha, er adamnyń buryn júrek aýrýlary bolǵan.
— Túsý barysynda onyń júrek tusynda shanshý paıda bolyp, pýlsi kúrt jıilegen. Osyǵan baılanysty oǵan shuǵyl medıtsınalyq kómek qajet bolǵan, — delingen habarlamada.
Shaqyrtýǵa TJM qutqarý qyzmetiniń toby jedel áreket etti. Qutqarýshylar týrısti qaýipsiz túrde tómenge túsirip, keıin ony TJM Apattar medıtsınasy ortalyǵynyń brıgadasyna tapsyrdy.
Zardap shegýshige tıisti medıtsınalyq kómek kórsetildi.
Osydan buryn Almaty taýlarynda eki jasóspirim qutqarylǵanyn jazǵanbyz.
