Almaty taýlaryna 500 órik kósheti otyrǵyzyldy
ALMATY. KAZINFORM — «Almaty - bizdiń ortaq úıimiz» aktsııasy aıasynda Býtakovka shatqalyna 500 jemis aǵashy - órik otyrǵyzyldy.
«Medeý» memlekettik óńirlik tabıǵı parki dırektorynyń orynbasary Uzaq Myqıtanovtyń aıtýynsha, bul atalǵan ýchaskege byltyr 1000 Sıvers alma aǵashy otyrǵyzylǵan.
«Bıyl tańdaý órik kóshetterine tústi, óıtkeni olar taýly aımaqtaǵy klımattyq jaǵdaılarǵa jaqsy beıimdelgen. Órik kóshetterin otyrǵyzý aldynda tamyrlar keýip qalmas úshin arnaıy boltýshkalarda (jer men sý) ustadyq», - dep bólisti ol.
«Medeý» tabıǵı parki qyzmetkerlerinen basqa, aǵash otyrǵyzýǵa oblystyq jáne qalalyq Ekologııa basqarmalarynyń, Medeý aýdany ákimdigi men prokýratýrasynyń qyzmetkerleri, sondaı-aq ekobelsendiler men eriktiler qatysty.
«Keshe biz ardagerler jáne zeınetkerlerimen birge senbilik ótkizdik. Biz osy aktsııany jalǵastyryp, barshany qalany abattandyrý men kógaldandyrýdy qadaǵalaýǵa shaqyramyz», - dedi stýdenttik ekopatrýldiń basshysy Ádil Nurpeıisov.
Eske salsaq, «Almaty – bizdiń ortaq úıimiz» naýqany 8 sáýirde bastaldy. Árbir turǵyn megapolısti damytýǵa jáne kógaldandyrýǵa óz úlesin qosa alady.
