Almaty taý klasterinde qosymsha 30 arqanjol, 161 shaqyrym shańǵy jolaǵy paıda bolady

ASTANA. KAZINFORM – Týrızm jáne sport mınıstri Erbol Myrzabosynov Úkimet otyrysynda Almaty taý klasteriniń bazasynda taý shańǵysy týrızmin damytý jospary iske asatynyn málim etti.

- Keshendi jospar aıasynda Almaty taý klasterinde jumys istep turǵan taý-shańǵy kýrorttaryn keńeıtý men olardy biryńǵaı júıege biriktirý josparlanyp otyr. Qosymsha 30 arqanjol men shańǵy tebetin 161 shaqyrym jol paıda bolady. Osy arqyly qazirgi júktemeni azaıtyp, jyl saıyn keletin týrıster aǵynyn 5 mln adamǵa deıin kóbeıte alamyz, - dedi ol.

Mınıstr taý shańǵysymen áýestenetin týrısterdiń ekonomıkaǵa tıgizetin paıdasy mol ekenin aıtady.

- Bul jobanyń atalǵan aımaq úshin úlken áleýmettik-ekonomıkalyq áseri bar. Sebebi álemdik tájirıbege súıensek, taýda shańǵy tebetin bir týrıst jaǵajaıǵa baratyn týrıspen salystyrǵanda jeti ese kóp aqsha jumsaıdy, - dedi Erbol Myrzabosynov.

Aıta keteıik, búgingi Úkimet otyrysynda týrızmdi damytý máseleleri qaralyp jatyr.