Almaty taý klasterin damytýǵa 526 mlrd teńge jumsalady
ASTANA. KAZINFORM — Qarjy 2025-2029 jyldarda júzege asyrylatyn jobalardy qamtıdy. Bul jóninde QR Týrızm jáne sport mınıstrligi resmı saýalymyzǵa joldaǵan jaýabynda málimdedi.
— Qazaqstan Respýblıkasy Úkimetiniń qaýlysymen Almaty taý klasteri týrızmin damytýdyń 2025-2029 jyldarǵa arnalǵan keshendi jospary bekitildi. Keshendi jospar 526 mlrd teńge somasyna ınfraqurylym qurý, ınvestıtsııalyq jobalardy iske asyrý, salany ilgeriletý jáne tsıfrlandyrý boıynsha 73 is-sharany qamtıdy, — delingen habarlamada.
Joba aıasynda taý shańǵysy kýrorttary keńeıtiledi jáne biryńǵaı júıege biriktiriledi.
— 30 aspaly jol jáne 161 shaqyrym jaıaý júrginshiler joly salynady. Bul bir jylda 5 mıllıon týrıst kelýine múmkindik beredi. Onyń 1,7 mıllıony sheteldik saıahatshy bolady dep boljanyp otyr, — delingen resmı jaýapta.
Sondaı-aq týrızm salasynda jumyspen qamtylǵandar sanyn 101,8 myń adamǵa, al tólenetin salyq mólsherin jylyna 117,3 mlrd teńgege jetkizý kózdeledi.
Aıta keteıik, buǵan deıin Almaty taý klasterin damytý baǵytynda qandaı jumystar atqaryla bastaǵanyn jazǵanbyz.