Almaty taý klasterin damytý baǵytynda qandaı jumystar atqaryla bastady

2025–2029 jyldarǵa arnalǵan keshendi jospar qoldanystaǵy taý shańǵy kýrorttaryn keńeıtýdi jáne olardy birtutas júıege biriktirýdi kózdeıdi. Joba aıasynda 30 aspaly jol men 161 shaqyrymdyq shańǵy trassalaryn salý josparlanyp otyr.

Týrızm ındýstrııasy komıteti tóraǵasynyń mindetin atqarýshy Nurbol Baıjanovtyń aıtýynsha, bul – qazirgi ınfraqurylymǵa túsetin júktemeni azaıtýǵa jáne jyl ishindegi týrıstik aǵyndy 5 mıllıon adamǵa deıin arttyrýǵa múmkindik beredi.

Al redaktsııa saýalyna jaýap bergen Almaty qalasy týrızm basqarmasynyń málimetine sáıkes, qazir keshendi jospar aıasyndaǵy birqatar nysan boıynsha jobalaý-smetalyq qujattama ázirlenip jatyr. Qujattar daıyndalyp, memlekettik saraptamadan ótkennen keıin jobalardy odan ári iske asyrý formaty aıqyndalady jáne jumys merzimderi naqtylanady.

Týrıstik marshrýttar men kempıng aımaqtary

Búgingi tańda 1000 shaqyrymnan astam taýly jaıaý júrginshiler marshrýty tsıfrlandyrylǵan. Onyń 850 shaqyrymnan astamy abattandyryldy. Sonymen qatar 16 kempıng aımaǵy quryldy. Barlyq marshrýttar 2GIS syndy tsıfrlyq platformalarǵa biriktirilgen, bul týrısterge baǵytty aldyn ala josparlaýǵa múmkindik beredi.

Abattandyrý jumystary aıasynda on taý baǵytynda belgiler men qaýipsizdik elementteri: tústi tańbalar, aqparattyq taqtaıshalar men eskertý belgileri ornatylǵan. Týrısterge qolaıly bolý úshin demalys oryndary, qorshaýlar, ótkelder, kúrkeler, oryndyqtar jasaqtalǵan. Sonymen qatar qalanyń eń kórikti tabıǵı nysandarynyń biri — «Alma-Arasan» termaldy bulaǵyn qaıta jańartý jumystary aıaqtaldy.

Týrısterge jaǵdaı jasaý úshin jetýi qıyn taýly aımaqtarǵa — Sol jaq Talǵar, Kúnshýaq alańy jáne Ótpeli (Prohodnoe) shatqaldarynda qosymsha úsh kempıng aımaǵy salyndy. Olar avtonomdy energııamen qamtamasyz etý úshin kún panelderimen jabdyqtalǵan. Al Úlken Almaty shyńy, Qanysh Sátbaev shyńy jáne Jastar shyńynda taýǵa shyqqan adamdardy esepteıtin avtomatty eseptegishter ornatyldy.

Sanıtarlyq-qaýipsiz jaǵdaılardy qamtamasyz etý maqsatynda Qımasar, Tuıyqsý jáne Kúmissý bulaqtarynyń mańynda sý alý oryndary jabdyqtaldy. Al Fýrmanov shyńynyń etegindegi 2550 metr bıiktikte ornalasqan átkenshek qaıta jóndeýden ótti. Týrısterdi aqparattandyrý maqsatynda taý taqyrybyna arnalǵan jalpy tırajy 27 500 dana polıgrafııalyq ónimder — atlas, karta jáne broshıýralar shyǵarylǵan. Sondaı-aq, 100-den astam týrıstik nysan men 10 marshrýtty qamtıtyn aýdıogıd jasaldy.

Bıyl taǵy 350 shaqyrym taý soqpaqtaryn abattandyrý josparlanyp otyr. Bul taý marshrýttary jelisin qalyptastyrý boıynsha josparlanǵan jumystardy 100% oryndaýǵa múmkindik beredi.

Ekotýrızmdi damytý aıasynda Úlken Almaty kóline deıin uzyndyǵy 5,3 shaqyrym bolatyn jaıaý júrginshiler jolyn salý da qarastyrylǵan. Qurylys jumystary 2026 jyldyń mamyr-jeltoqsan aılarynda júrgizilýi tıis.

- Bul sharalardy iske asyrý Almatynyń Ortalyq Azııadaǵy jetekshi taýly týrıstik baǵyttardyń biri retindegi pozıtsııasyn nyǵaıtýǵa, qaýipsiz ári ekologııalyq demalys formatyn qamtamasyz etýge, sondaı-aq týrıstik aǵynnyń turaqty ósýine jaǵdaı jasaýǵa múmkindik beredi, — dep atap ótti týrızm basqarmasy.

Avtojoldar qurylysy, elektr jáne sýmen jabdyqtaý

Almaty taý klasterin damytýdyń keshendi jospary aıasynda Úlken Almaty kóli baǵytyndaǵy «Almaty — Kosmostantsııa» avtojolynyń 8-den 34-shaqyrymyna deıingi ýchaskesin jóndelmek. Onyń uzyndyǵy – 26 shaqyrym. Qazirgi onyń jobalaý-smetalyq qujattamasy ázirlenip jatyr.

- Taý relefi men aýmaqtyń ınjenerlik daıyndyǵynyń kúrdeliligin eskere otyryp, qurylys-montajdaý jumystary shamamen 2027–2028 jyldary júrgiziledi, — dep málimdedi vedomstvo.

Sonymen qatar taýly aýmaqtardy elektrmen jáne sýmen jabdyqtaý máseleleri boıynsha jobalaý-izdestirý jumystary bastalǵan. Mamandar qajetti qýat kózderiniń bar-joǵyn jáne ınjenerlik jelilerdi tartýdyń ońtaıly nusqalaryn baǵalap jatyr.

Eske salaıyq, buǵan deıin Týrızm jáne sport mınıstri Erbol Myrzabosynov Úkimet otyrysynda Almaty taý klasteriniń bazasynda taý shańǵysy týrızmin damytý jospary iske asatynyn málim etti.