Qazaqstan kýrorttaryndaǵy bir táýliktik demalystyń ortasha quny qansha
ASTANA. KAZINFORM — 2026 jyldyń alǵashqy jartyjyldyǵynda Qazaqstandaǵy týrıstik qyzmetter kólemi 11,4% ósip, 91,2 mlrd teńgege jetti. Byltyr osy kezeńde bul kórsetkish 81,9 mlrd teńge bolǵan.
Bıyl qańtar-maýsym aılarynda elimizdiń kýrorttyq aımaqtarynda 1 912 ornalastyrý orny jumys istedi. Bul byltyrǵy osy kezeńmen salystyrǵanda 64 nysanǵa nemese 3,5% kóp. 2025 jyldyń alǵashqy alty aıynda olardyń sany 1 848 bolǵan.
Kýrorttyq aımaqtardaǵy ornalastyrý oryndarynyń bir mezgildegi syıymdylyǵy 122,4 myń tósek-orynǵa jetti. Byltyr bul kórsetkish 120,2 myń edi. Al nómirlik qor 1,9%-ǵa ósip, 47,3 myń nómir boldy.
Qaı óńirler týrıster arasynda tanymal?
Ornalastyrý oryndarynyń sany boıynsha Almaty taý klasteri kósh bastap tur. Munda 526 nysan bar. Odan keıin Jetisý oblysyndaǵy Alakól kýrorttyq aımaǵy (226), Şýche-Býrabaı (216) jáne Abaı oblysyndaǵy Alakól kýrorttyq aımaǵy (206) ornalasqan.
Týrıster eń kóp barǵan baǵyt ta — Almaty taý klasteri. 2026 jyldyń alǵashqy alty aıynda munda 1,2 mln-nan astam kelýshige qyzmet kórsetilgen. Bul elimizdiń kýrorttyq aımaqtaryna kelgen týrısterdiń jalpy sanynyń shamamen 59,4%-yna teń. Al kórsetilgen qyzmetterdiń kólemi 57,1 mlrd teńgege jetti.
Tanymal týrıstik baǵyttardyń qatarynda Şýche-Býrabaı, Mańǵystaý, Túrkistan, Balqash jáne Altaı kýrorttyq aımaqtary da bar.
Nómirlik qordyń basym bóligi Almaty taý klasterinde shoǵyrlanǵan. Munda 15,9 myń nómir bar. Jetisý oblysyndaǵy Alakól kýrorttyq aımaǵynda — 5,7 myń, Abaı oblysyndaǵy Alakólde 5,4 myń nómir tirkelgen.
Qonaqúılerdiń toltyrylý deńgeıi qandaı?
Nómirlik qordyń toltyrylýy boıynsha Abaı oblysyndaǵy Alakól kýrorttyq aımaǵy alda keledi. Munda kórsetkish — 40,1%. Almaty taý klasterinde bul deńgeı 39,7%, al Katonqaraǵaı kýrorttyq aımaǵynda 37,6% boldy.
Jalpy, 2026 jylǵy qańtar-maýsym aralyǵynda kýrorttyq aımaqtarda 1,58 mln nómir satylyp, 2,79 mln tósek-táýlik usynyldy. Bir tósek-táýliktiń ortasha quny 18 627 teńgege jetti.
Eske salaıyq, buǵan deıin Qazaqstanda týrızmnen túsken salyq túsimderi 303 mlrd teńgege jetkenin habarlaǵan edik.