Almaty taǵy birneshe qurylys kompanııasy men tehnıkalyq qadaǵalaý uıymdary lıtsenzııasynan aıyryldy

ALMATY. KAZINFORM – Almatyda birneshe qurylys kompanııasy lıtsenzııasynan aıyryldy. Bul týraly Almaty ákiminiń orynbasary Beıbit Shahanov aıtty.

Onyń sózinshe, memlekettik sáýlet-qurylysyn baqylaý — ákimdik jumysyndaǵy mańyzdy baǵyttarynyń biri. Bıyl qurylys nysandaryna 1300-den astam jospardan tys tekseris júrgizilip, 350 myń teńgeden astam ákimshilik aıyppul salynǵan. Sondaı-aq 600-den astam nusqaýlyq berilip, anyqtalǵan buzýshylyqtar joıyldy.

Sondaı-aq Beıbit Shahanov taǵy birneshe qurylys kompanııasy, tehnıkalyq qadaǵalaý jáne josparlaý uıymdary lıtsenzııasynan aıyrylǵanyn atap ótti.

— Lıtsenzııadan aıyrý — naryqty adal emes kompanııalardan tazartýdyń eń tıimdi quraly bolyp sanalady. Bıyl bes qurylys kompanııasy lıtsenzııasynan aıyryldy. Eki tehnıkalyq qadaǵalaý uıymy akkredıtatsııadan, al bir jobalaý uıymy lıtsenzııasynan aıyryldy, — dedi ol.

Almaty ákiminiń orynbasary bıyl ákimdik tarapynan qurylys normalaryn buzý derekteri boıynsha sotqa 80-ge jýyq talap-aryz joldanǵanyn atap ótti. Aıtýynsha, olardyń jartysyna jýyǵy sotta qanaǵattandyryldy. Olardyń ishinde 62 talap qurylys nysanyn tolyq ne ishinara buzýdy kózdeıdi. Jyl basynan beri qalada 38 zańsyz nysan buzylǵan jáne taǵy 70 nysandy buzylýdy josparlanǵan.

— Bizdiń maqsatymyz — jobalaýdan bastap nysandy paıdalanýǵa berýge deıingi barlyq kezeńderde jumystardyń zańnamaǵa sáıkes kelýin qamtamasyz etetinin ashyq jáne tıimdi baqylaý júıesin qurý, — dedi ol.

Eske salaıyq, bir aı buryn Beıbit Shahanov Almatyda eki qurylys kompanııasy lıtsenzııasynan aıyrylǵanyn aıtqan edi.