«Almaty Sý» sý qubyry men káriz júıesiniń basqa kompanııaǵa beriletinin joqqa shyǵardy
ASTANA. KAZINFORM — Almatydaǵy sý qubyry men káriz júıesi basqa kompanııanyń basqarýyna beriledi degen aqparat shyndyqqa janaspaıdy.
«Almaty Sý» MKK málimetinshe, áleýmettik jeliler men keıbir aqparat quraldarynda taraǵan aqparatqa negiz joq.
«Almaty Sý» MKK — Almaty qalasynyń sýmen jabdyqtaý jáne sý burý júıeleriniń jumysyn qamtamasyz etetin memlekettik kommýnaldyq kásiporyn. Qazir mekeme shtattyq rejımde jumys istep jatyr.
— «Almatynyń sýmen jabdyqtaý jáne sý burý júıelerin basqa kompanııalardyń basqarýyna berý josparlanbaǵan», — dep habarlady kásiporyn.
Osyǵan baılanysty «Almaty Sý» turǵyndardy jalǵan aqparatqa senbeýge jáne málimetterdi taratpas buryn onyń durystyǵyn tekserýge úndedi.
Kásiporyn sondaı-aq Qazaqstan zańnamasynda kórineý jalǵan aqparat taratqany úshin jaýapkershilik qarastyrylǵanyn eske saldy.
