Almaty sportshylarynan taǵy 6 lıtsenzııa kútemiz – Erkin Qazybaev
ALMATY. KAZINFORM – Almaty qalasynyń Mamandandyrylǵan joǵary sport sheberligi mektebiniń basshysy Erkin Qazybaev olımpıadaǵa attanatyn almatylyq sportshylardyń daıyndyǵy jóninde áńgimeledi.
Onyń aıtýynsha, qazirgi ýaqytta Almatydan 8 sportshy 4 sport túrinen Parıjde ótetin olımpıadaǵa joldama jeńip alǵan. Aldaǵy ýaqytta bul tizim taǵy 6 lızentsııamen tolyǵýy múmkin.
«Mekeminiń mindeti men qyzmeti – QR Ulttyq qurama komandasyna rezervter daıyndaý. Bizdiń bazamyzda jazǵy olımpıadalyq sport túrleri boıynsha eresek sportshylar daıyndalady. Almaty qalasy boıynsha qazirgi tańda 8 lıtsenzııa bar. Respýblıka boıynsha joldama sanynan ekinshi oryndamyz. Qazirgi tańda 4 lıtsenzııa nysana kózdeý sporty boıynsha, 2 lızentsııa sporttyq gımnastıkadan, 1 joldama eskek esý sportynan jáne taǵy bireýi semserlesýden alyndy. Nysana kózdeýden joldama alǵandar – Islam Sátbaev, Konstantın Malınovskıı, Arına Altýhova jáne Aleksandra Le. Sporttyq gımnastıkadan lıtsenzııany – Mılad Karımı men Narıman Kýrbanov jeńip aldy. Semserlesýden Áıgerim Sarybaı, al eskek esýden Tımýr Haıdarov pen Sergeı Emelıanov joldama aldy. Sondaı-aq qazir úmit artyp otyrǵan 6 sportshymyz bar. Olar: ústel tennısinen Sarvınoz Mırkadyrova, quzǵa órmeleýden Rıshat Haıbýllın, áıelder boksynan Nazym Qyzaıbaı, dzıýdodan Ǵusman Qyrǵyzbaı, jeńil atletıkadan Krıstına Ovchınnıkova jáne Krıstına Morozova. Bul sportshylar maýsymnyń aıaǵyna deıin ártúrli lıtsenzııalyq jarystarǵa qatysady», – dedi Erkin Qazybaev.
Ol sondaı-aq Tokıo-2020 olımpıadasyna Almatydan 7 sportshy qatysqanyn atap ótti. Maýsym aıynyń sońyna deıin ótetin lıtsenzııalyq jarystardyń nátıjesi boıynsha bul nátıje bıyl birneshe márte jaqsarýy múmkin.
«Ulttyq qurama komandanyń óziniń daıyndyq baǵdarlamasy bar. Olardy Respýblıkada qarjylandyrady. Qazir bizdiń sportshylarymyz ulttyq qurama sapynda daıyndalyp júr. Biz ózimiz qala tarapynan Krıstına Ovchınnıkovany Eýropadaǵy 3 týrnırge qatysyp, upaıǵa jınaýǵa jiberip jatyrmyz. Eger reıtıngte kóterilip, aldyńǵy 32 sportshynyń qataryna kirse, joldama alady. Al ótken Tokıodaǵy olımpıadaǵa Almatydan 7 sportshy qatysqan edi. Qazir ol nátıjeden asyp turmyz jáne úmittenip otyrǵan 6 adamnan kemi 2-3 lıtsezııa alamyz degen oıdamyz. Ǵusman Qyrǵyzbaı qazir reıtıngke kirip tur. Endi Abý-Dabıde ótetin álem chempıonatynda jaqsy kúresip jiberse, ol da joldama alady dep oılaımyn», – dedi mekeme basshysy.
Mamandandyrylǵan joǵary sport sheberligi mektebiniń basshysy qandaı sport túrlerinen jeńis pen júlde kútetinin aıtyp ótti.
«Menińshe, sporttyq gımnastıkadan júlde kúte alamyz. Óıtkeni Narıman Kýrbanov ta, Mılad Karımı de álemde óz ornyn kórsetken sportshylar. Olardyń álemde bekitilgen baǵdarlamasy bar. Búgingi kúni nysana kózdeý sporty da jaman emes, sondyqtan odan de jeńis kútemiz. Oq atý sportynda 2022-2024 jyldary jalpy modernızatsııa boldy, ıaǵnı qarý-jaraqtarmen, sporttyq jabdyqtarmen qamtyldy. Ol da óz nátıjesin berip jatyr. Árıne, ulttyq bolmasa da, tól sportymyzǵa aınalyp ketken bokstan da medal alamyz dep oılaımyn», – dedi ol.
Erkin Ábdireshbaıuly dúnıejúzilik jarysqa lızentsııa sanyp kóbeıtý úshin barlyq sport salasyndaǵy mamandardyń jumysyn júıege keltirip, ár sportshyny jeke daıyndaý kerek ekenin aıtady.
«Áıelder kúresinen, aýyr atletıkadan joldama alynbaı qaldy. Áıelder kúresinen 50 kelide Laýra Ǵanıqyzy ulttyq qurama sapyndaǵy eń jas sportshy boldy. Oǵan áli fızıkalyq daıyndyǵyn kóterý kerek. Óıtkeni jas sportshy, býyny qatpaǵan. 2028 jylǵy olımpıadaǵa jaqsy daıyndyqpen keledi dep oılaımyn. Jalpy qazirgi nátıjeni kóterý úshin bizge olımpıada oıyndary bite salysymen 4 jyldyq jospar jasaýymyz qajet. Ár sportshyǵa jeke maqsattyq baǵdarlama jasap, 4 jylǵa deıin maqsatty túrde sportshylarymyzdy daıyndaıtyn bolsaq, sol kezde nátıje bere alamyz. Onyń ortasynda 2026 jyly bizde Azııa oıyndary bar. Ol bir synaq bolady. Sondyqtan olımpıada aıaqtalǵan soń osy jumysty bastap ketýimiz kerek. Bul bir ǵana jattyqtyrýshynyń jumysy emes. Sporttyq dárigerler, psıhologtar, sporttyq massajıster – barlyǵyn bir júıege keltirýimiz kerek», – dep atap ótti Erkin Qazybaev.
Sporttyq mekeme basshy bıyl olımpıadaǵa alǵash ret qosylǵan skeıtbordıng, quzǵa órmeleý, serfıng, breık-danstyń Qazaqstandaǵy bolashaǵy jaıly jáne kıbersporttyń dúnıejúzilik jarysqa qosylýy jaıly pikir bildirdi.
«Barlyq óńirlermen salystyrǵanda eń kóp sport túrleri damyp jatqan qala – Almaty. Ulttyq qurama sapynda sportshylardyń eń kóbi Almaty qalasynan qosylady. Ótken jyly jazǵy Spartakıada ótti, ony 4 jylda bir ret ótetin Qazaqstannyń olımpıadasy desek bolady. Sonda almatylyq sportshylar 84 altyn, 71 kúmis, 73 qola jeńip, jalpykomandalyq esepte birinshi boldy. Al skeıtbordıng, breık-dans syndy sport túrlerinen daıyndaýǵa bizdiń klımattyq jaǵdaı sáıkes keledi dep oılaımyn. Sondaı-aq megapolıste jastar kóp. Sondyqtan qalamyz breık-dans syndy sport túrleriniń damýyna qolaıly. Al quzǵa órmeleý bizde jaqsy damyǵan. Odan Tokıo olımpıadasyna Rıshat Haıbýllın qatysqan bolatyn. Al kıbersport qazirgi zaman talabyna baılanysty damyp kele jatyr. Biraq menińshe, kıbesportty jazǵy olımpıadaǵa qosýdyń qajeti joq. Ony ıntellektýaldy shahmattan ótetin olımpıadaǵa qosqan durys bolady. Sebebi dástúrli sport túrleri fızıkalyq turǵyda ótedi. Al munda adamnyń oılaý qabileti boıynsha ótedi, ıaǵnı fızıkalyq daıyndyqty qajet etpeıdi», – Erkin Qazybaev.
