Almaty sportshylary aı saıyn alatyn tólemaqy basqa óńirlerden 66% az - basqarma

Almatylyq sportshylar men jattyqtyrýshylar basqa óńir komandalarymen shart jasasýǵa májbúr. Bul turaly Almaty qalasy sport basqarmasynyń basshysy Erden Haırýllın Instagram paraqshasynda jazdy, dep habarlaıdy Kazinform. 

Almaty qalasy sport baskarmasy basshysynyń málimetinshe, Almaty sportshylaryna aı saıyn tólenetin tólemder basqa óńirlermen salystyrǵanda 66,5% tómen.

«Mysaly, Olımpıada men Paralımpıadada I oryn úshin - 80 AEK (276 000 teńge). Sol sebepti bolashaǵy bar sportshylar men jattyqtyrýshylar basqa óńir komandalarymen shart jasasýǵa májbúr. Osyǵan oraı tıisti qaýlynyń jobasy Ashyq NQA portalynda jarııalandy. Qaýly 10-15 kún ishinde qaralady. Bul shara jetekshi sportshylar arasynda áleýmettik turaqtylyqty, olardyń áleýetin saqtaýǵa jáne sportta jetistikke jetýde tıimdilikti arttyrýǵa múmkindik beredi», - dep jazdy Erden Haırýlın.

Ol sondaı-aq búginge deıin Almaty sportshylary 2024 jyly Parıjde ótetin Olımpıada oıyndaryna tórt joldama utyp alǵanyn jazdy.